УИХ-ын чуулганы үдээс хойших хуралдаанаар Ерөнхий сайд У.Хүрэлсүх Боловсролын салбарт хийгдэж байгаа ажил болон Боловсролын салбарын шинэчлэлийн талаар мэдээлэл өгөх байсан. Уг мэдээллийг Ерөнхий сайд бус Шадар сайд Я.Содбаатар УИХ-ын гишүүдэд танилцуулсан юм. Уг мэдээлэлтэй холбогдуулан цөөнхийн бүлгийг төлөөлж АН-ын бүлгийн дарга Д.Ганбат дүгнэлтээ танилцуулсан. Тэрбээр цар тахлын хүнд нөхцөлд Ерөнхий сайдыг чуулганы хуралдаанд мэдээлэл хийхгүй байгааг шүүмжилсэн юм. “УИХ-ын чуулганы хуралдаанд өөрийн биеэр ирж мэдээлэл хийх нь нийт ард түмэндээ мэдэээлэл хийж байгаа гэсэн үг” гэлээ. Түүнчлэн “Ерөнхий сайд жиндэх маягтай өрөөндөө сууж байна гэсэн. Цаана чинь хүүхдүүд даарч, жиндэж байгааг мэдэж байна уу. Цахим сургалт үр дүнтэй гээд яриад байх юм. Хэдэн хүүхэд компьютертэй, хэдэн хүүхэд зураг үзэж байгаа судалгааг гаргасан уу” гэхэд Шадар сайд Я.Содбаатар дэлхий нийтээрээ цахим сургалт хийж байна гэсэн тайлбар өглөө.