УИХ-ын Нийгмийн бодлогын байнгын хорооны өнөөдрийн хуралдаанаар Хөдөлмөрийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийж байна. 

УИХ-ЫН ГИШҮҮН Б.САРАНЧИМЭГ “Хөл хориотой холбогдуулан ажлын байр хадгалах, цалин хөлсний асуудлыг хуульд тусгасан зүйл байгаа юу. Сул зогсолтыг хэрхэн зохицуулж байгаа вэ. Хуульд цахимаар ажиллаж байгаа зохицуулалтыг тусгасан уу” гэхэд 

УИХ-ЫН ГИШҮҮН Ц.МӨНХ-ОРГИЛ: Гурван төрлийн сул зогсолт байна. Нэгдүгээрт ажил олгогчийн буруугаас болоод сул зогсолт үүссэн бол тухайн ажилтан бүх цалин хөлсөө авна. Харин ажилтны буруугаас болоод сул зогсолт үүссэн бол тухайн ажил олгогч цалин хөлсөө өгье гэвэл авч болно, өгөхгүй гэвэл ажилтан цалин хөлс авахгүй. Гуравдугаарт аль алинаас нь хамаараагүй бөгөөд өнөөдрийн цар тахал шиг нөхцөл байдал үүсвэл одоо мөрдөгдөж байгаа хуулийн ерөнхий зохицуулалт хэвээр үйлчилж байгаа. Тэр нь цалингийн 50 хувиа авна гэсэн зохицуулалт байгаа. 

Ер нь ковид, техник технологи, мэдээллийн эрин үед дэлхий даяар ажлын байрны зохицуулалт өөрчлөгдөж байна. Энэ хуулийн төсөлд Зайнаас ажиллах хөдөлмөрийн гэрээг тусад нь зүйл анги болгож оруулж байна. Гэхдээ оффис дээр ирж ажилладаг эрх үүргийн хувьд адилхан байна. Зайнаас ажиллаж байна гээд цалин хөлсийг нь хасахгүй байх зохицуулалт оруулж өгч байгаа. Авах ёстой цалингаа авна. Гэхдээ үүрэх ёстой хариуцлагаа үүрч, хийх ёстой ажлаа хийнэ. 

Мөн хөдөлмөрийн хуулиар ялгаварлан гадуурхалтыг зогсооно. Ажил олгогч тухайн байгууллага дээрээ ялгаварлан гадуурхдаггүй, ажлын байрны хүчирхийлэл, бэлгийн дарамтыг бий болгох орчныг бүрдүүлэхгүй байх үүргийг хүлээж байгаа. Хэрвээ тухайн байгууллагад ийм асуудал гарвал хуулиар хүлээсэн үүргээ биелүүлээгүй байна гээд Зөрчлийн тухай хуулиар торгуулна. Харин бэлгийн дарамт үйлдээд байгаа этгээд нь Эрүүгийн хуулиар хариуцлага хүлээнэ. Ажилтнуудад ХҮЭК, шүүх8 үйлдвэрчний эвлэл, ТББ-д хандах эрхийг нь нээж өгч байгаа. Шинэ зохицуулалтаар дээрх байгууллагын хаана, хэнд хандах вэ гэдгийг тодорхой болгож өгнө. Тухайлбал, албан тушаал, нэр хаяг, утсыг нь бичээд ажилтан бүрд харагдахуйц газар хэвлэж тавих үүргийг ажил олгогчид өгнө.