УИХ-ын Нийгмийн бодлогын байнгын хорооны өнөөдрийн хуралдаанаар Хөдөлмөрийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийлээ. Хуулийн төслийн танилцуулгыг УИХ-ын гишүүн Ц.Мөнх-Оргил хийсэн юм. 

Аж ахуйн нэгж байгууллагын ажилтны цалин хөлс, амралт, ажлын цаг, хөдөлмөр эрхлэлтийг хуулиар зохицуулах, дарамт, хүчирхийллээс ангид байх суурь эрхийг уг хуулийн төсөлд тусгасан байна. Мөн албадан хөдөлмөр эрхлэлтийг тодорхойлжээ. Хөдөлмөрийн тухай хуулиар хөдөлмөрийн гэрээгээр зохицуулах нийтлэг хариуцлага, хэлбэр агуулга, хугацааг нэмж тодорхой болгосон байна. Түүнчлэн ажил олгогчоос тухайн иргэний гадаад паспорт, иргэний үнэмлэхийг шаардах, улмаар хураан авахыг хориглосон зэрэг заалтууд оржээ. Хуулийн төсөлтэй холбогдуулан гишүүд асуулт асууж, хариулт авсан юм. Тухайлбал, 

УИХ-ЫН ГИШҮҮН Х.БОЛОРЧУЛУУН “Хөдөлмөрийн тухай хууль 1999 оноос хойш шинэчлэн батлагдаагүй байсан. Орон нутагт ажиллаж байгаа хүмүүсийн ажил амралтыг 14:14 хоног болгож байгаа нь их зөв байна. Энэ талаар хүмүүсээс их гомдол ирдэг байсан. Олон хоног ажиллах нь цалингаас илүү ар гэрийн тогтвортой байдал алдагдахад хүрдэг” гэхэд УИХ-ЫН ГИШҮҮН Ц.МӨНХ-ОРГИЛ “Уртын ээлжээр ажиллах хоногийн зохицуулалтын талаар ажлын хэсэг олон санал авч, судалсан. Мөн Уул уурхайн үйлдвэрчний эвлэлийн саналыг хүлээн авч, 14:14 хоног болгосон. Үйлдвэрчний эвлэлийнхэнтэй  хоёр хоногийн өмнө ажлын хэсгийнхэн бүрэн бүрэлдэхүүнээрээ уулзсан. Үүн дээр “14:14 болголоо, гэхдээ  20:10-аар ажиллахад 806 цагийн илүү цаг байгаа. 14:14-өөр ажиллахад нэг сарын илүү цагийн тооцоо 200 цаг болж буурч байгаа. Өөрөөр хэлбэл, илүү цаг дөрөв дахин буугаад цалин хөлсөнд нөлөөлнө. Үүнийг уурхайчид ойлгож байгаа биз дээ” гэдгийг хэлсэн. Илүү цагийн талаар уурхайчдад мэдээлэл хүргүүлэх байх” гэлээ.