АТГ-аас Хөгжлийн банкны тэргүүн дэд захирал асан Ч.Энхбатыг шалгаж байна Түүнийг  эрх мэдэл, албан тушаалаа урвуулан ашиглаж бусдад зээл олгож, улсад их хэмжээний хохирол учруулсан гэх үндэслэлээр яллагдагчаар татан шалгаж эхэлснийг албаны эх сурвалж онцолж байна.  Түүнийг  “Газ-Импорт” гэх компанид Банкны тухай хууль зөрчиж өнгөрсөн хугацаанд 223 сая гаруй иен буюу 4.8 тэрбум төгрөгийн зээлийг “Газ-Импорт” ХХК-д эрх мэдэл, албан тушаалаа урвуулан ашиглаж олгосон хэмээн үзжээ. Мөн  “Газ-Импорт” ХХК өмнө нь авсан зээлүүдийнхээ зарцуулалтын баримтыг гаргаж өгөөгүй байхад ямар үндэслэл, журмаар дахин дахин зээл олгосон бэ гэдгийг шалгаж байна. Энэ асуудалд тэргүүн дэд захирал асан Ч.Энхбатаас гадна Хөгжлийн банкны газар, хэлтсийн дарга нарыг шалгах юм. Өнгөрсөн   пүрэв гарагт Хөгжлийн банкны тэргүүн дэд захирлын үүрэгт ажлаа Ч.Энхбат  хүлээлгэн өгснөөр  Хөгжлийн банкны удирдлагуудыг Засгийн газраас шинээр томилоод байна.