Засгийн газрын хуралдаанаас гарсан шийдвэрийг танилцууллаа. Энэ үеэр албаныхан сэтгүүлчдийн асуултад хариуллаа.

-Өдрийн орлогоороо амьжиргаагаа залгуулдаг иргэдийн амьдрал хэцүүдлээ. Энэ хүмүүст төрийн зүгээс ямар  дэмжлэг үзүүлэх вэ?

-Засгийн газар иргэдтэй яг адилхан ажиллаж, амьдарч байгаа. Өдрийнхөө орлогоор амьдарч, зээлээ төлдөг, ЖДҮ эрхлээд түрээсээ төлдөг хүмүүс үнэхээр хүнд байгаа. Засгийн газар бүхий л боломжтой хувилбарыг судалж үзэж байна. Судалж үзээд иргэдийн хамгийн наад захын төлөх ёстой таван төрлийн хэрэглээний төлбөрийг төлөх шийд гаргасан. Мөн ажлын байраа хадгалж үлдэхийн тулд нийгмийн даатгалын төлбөрийг хойшлуулах, чөлөөлөх арга хэмжээ авсан. Түүнчлэн хүүхдийн мөнгөн тэтгэмжийг өсгөсөн гээд байж болох бүхий л арга хэмжээг цаг тухай бүрд нь авч, хэрэгжүүлж байна. Монгол Улсын Засгийн газрын  хөрөнгө хязгаарлагдмал. Бид тийм ч баян улс биш ээ. Бидний авч хэрэгжүүлж байгаа арга хэмжээ хязгаартай. Чадлынхаа хэрээр шаардлагатай арга хэмжээг авч байгаа. Мөн УИХ-д “Ковид-19”-ийн хуультай холбоотойгоор эдийн засгийн тодорхой арга хэмжээнүүд авах саналыг Монголбанк, Санхүүгийн зохицуулах хороо, Засгийн газар хамтраад гаргаж байгаа. Энэ саналууд дэмжигдээд тодорхой хэмжээний шийдэлд хүрэх болов уу гэж бодож байна. Тухайлбал, хугацаагүй хадгаламжийг хүүгүй болгох, барьцаалдан зээлэх үйлчилгээний газрын хүүг багасгах санал гарсан.

-Цах тахлын үед Засгийн газраас төлөвлөгөөний дагуу ажиллаж байгаа гэж мэдэгдсэн. Өнөөдрийн гаргаж байгаа шийдвэрүүд ямар төлөвлөгөөний дагуу гарсан юм бэ?

-Бид төлөвлөгөөтэй ажиллаж байгаа. Дэлхийн олон улс орон гаргаж байгаа шийдвэрээ эргэж харах, уялдаа холбоотой хандах, зарим үед цаг алдахгүй хариу арга хэмжээ авах зэрэг олон ажилтай нүүр тулж байгаа. ДЭМБ-ын тооцооллоор Монгол Улсад халдвар класттер хэлбэрээр голомтлон тархаж байгаа. Энэ асуудал цаашаа хүндэрвэл иргэдийн дунд эх үүсвэр нь тодорхойгүй халдвар олон нийтийн дундаас илэрнэ. Үүний дараа эрүүл мэндийн байгууллагад ачаалал үүсэж, нийтийн цар тахалд хүрнэ гэж бий. Тухайлбал, эмнэлэг нь хүнээ авч дийлэхгүйд хүрвэл бас л бид дараах арга хэмжээ авна. Хэрэв хүн амынхаа тодорхой хувиас ихсэж, эмнэлгийн орноос хэтэрвэл иргэдээ гэрт нь эмчилнэ. Гэхдээ одоохондоо Монгол Улс ийм байдалд хүрээгүй байна. Ийм байдалд хүрвэл хүнд, маш хүнд хүмүүсээ л эмнэлэгт авчирна.Нууц төлөвлөгөөг ил гаргаж болохгүй.