УИХ-ын чуулганы хуралдаанаар Засгийн газраас өргөн мэдүүлсэн, Далайчныг сургах стандарт, гэрчилгээ олгох болон ээлжийн ажиллагааны тухай олон улсын конвенцын нэмэлт, өөрчлөлтийг соёрхон батлах тухай хуулийн төслийг Зам, тээврийн хөгжлийн сайд Л.Халтар танилцуулсан. УИХ-ын гишүүд далайд Монгол Улсын далбаатай хичнээн усан онгоц явдаг талаар тодруулахад ЗАМ, ТЭЭВРИЙН САЙД Л.ХАЛТАР "БНСУ-д 11 далайчин дадлагажиж байгаа. Олон Улсын далайн байгууллагад ажиллах эрх нь нээгдэнэ. Их далайд 352 онгоц Монгол Улсын далбааг мандуулж явна. Монгол Улсын Засгийн газар хариуцлага хүлээх учир гаднын судалгааны байгууллагуудтай судалгаа хийж, бүртгэлийг баталгаажуулдаг. Монгол Улсад байгаа Далайн захиргаа хяналтаа тавьдаг" гэлээ. Харин "Монгол Улсын далбаа мандуулж явж байгаа онгоцон дээр ямар нэгэн асуудал үүсвэл хариуцлагыг нь манай улс үүрэх үү" гэсэн Н.Энхболд гишүүний асуултад "Далайн захиргааны газраас тухайн хөлөг онгоцны ахмад бүх хариуцлагыг хүлээдэг" гэлээ.