УИХ-ын чуулганы хуралдаанаар УИХ-ын гишүүн Ж.Бат-Эрдэнэ,  С.Бямбацогт, Л.Мөнхбаатар нарын гурван гишүүн 2020.01.13-ны өдөр өргөн мэдүүлсэн Эрдэнэсийн сангийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэх эсэхийг хэлэлцэж байна.

УИХ-ЫН ГИШҮҮН Т.АЮУРСАЙХАН “Монголбанк Эрдэнэсийн санг хариуцдаг.  Алдаа дутагдал их гарсан. Маш нууцын зэрэглэлтэй, эд хөрөнгийн хэд нь борлуулагдсан нь тодорхойгүй, түүнийг нь далимдуулаад үрэн таран хийсэн. Нөөц гээд байх зүйл үнэхээр байхгүй байна. Нууцаас гаргах тухай асуудлаа хангалттай хийгээгүй байна. Яагаад дутуу хийсэн юм бэ” гэхэд 

ХУУЛЬ ЗҮЙН БАЙНГЫН ХОРООНЫ ДАРГА С.БЯМБАЦОГТ "Эрдэнэсийн сангийн тухай хууль 1994 онд батлагдсанаас хойш өөрчлөлт хийгдээгүй. Эрдэнэсийн санг тойрсон хардлага гүтгэлэг, ташаа мэдээлэл зэрэг асуудлуудыг нэг мөр болгоё гэсэн зорилготой. Эрдэнэсийн сангийн хуулийн чиг үүрэг өргөн хүрээнд орж ирж байна. Тодорхой мэдээлүүдийг ил болгож, УИХ-д мэдээлэл өгдөг байхаар оруулж ирсэн" гэсэн тайлбар өглөө. 

Харин УИХ-ЫН ГИШҮҮН Н.АЛТАНХУЯГ “Манайд ер нь нууцгүй юм байна уу, бүх л юм нууц байна гэх юм. Монгол банкны байр хэдэн төгрөгөөр боссон юм бэ гэж асуусан чинь нууц гэсэн бичиг ирсэн. Дараа нь намайг улсын нууц задруулсан хэрэгт оруулах нь л дээ. Байшингийн талбай хүртэл нууц байна. Энэ хуулийг хэлэлцээд явах нь зөв.  Нууна гэдэг чинь чононд хонь хадгалуулж байгаатай адил. Тэгээд Монголбанк шалгана гэж юу байхав дээ. Хөндлөнгийн шалгалт байх хэрэгтэй. Ил тод байх хэрэгтэй. Нуух юм чинь хэмжээ хязгаартай баймаар байна” гэлээ. Монгол банкны тэргүүн дэд ерөнхийлөгч Г.Энхтайван Нууцын хуулиар Монгол банкны байшин барилга нууцад хамаарч явдаг гэсэн тайлбарыг өгсөн юм.