УИХ-ын чуулганы үдээс хойших хуралдаанаар Хүний эрх хамгаалагчийн эрх зүйн байдлын тухай хуулийн төсөл болон хамт өргөн мэдүүлсэн хуулийн төслийг хэлэлцэж байна. Энэ үеэр УИХ-ын гишүүн Т.Аюурсайхан Хүний эрхийн үндэсний комиссын гишүүдийг “шөнө, орой мессэж бичиж лобби хийж байгаа”-г шүүмжиллээ. Тэрбээр “Засгийн газрын хуралдааны тэмдэглэлд энэ хуулийн төсөл нь олон хууль тогтоомжтой  зөрчилдөж байна. Хүний эрхийн тулгамдсан асуудлыг тусгасан зүйл алга байна гэсэн байна. ХЭҮК-ын гишүүд хүний эрхийг хамгаалагч мөн. Гэхдээ “та бүхний гэр бүл, хамтран амьдрагчийг гүтгэж, залилж, хуурч мэхэлж болохгүй, үйл ажиллагааг нь дэмжихгүй байж болохгүй, гадуурхаж болохгүй” гэсэн байна. Монгол Улсын ямар ч иргэнийг ингэж болохгүй гээд хууль тогтоомжоор зохицуулчихсан байгаа. Заавал хуулиар үүнийг зохицуулах ямар шаардлага байна. Та нарыг шүүмжилж болохооргүй зохицуулалт хийсэн байна. Яагаад та нарыг шүүмжилж болдоггүй юм. Өнөөдрийг хүртэл, ажлаа хийж чадахгүй явж ирсэн чинь үнэн шүү дээ. Хүний эрх хаана зөрчигдөж байна, тэрний төлөө явах ёстой. 

Шөнө орой мессэж бичиж лобби хийдгээ болих хэрэгтэй. Хүний эрхийн үндэсний комиссын гишүүдийг томилсноос хойш хүний эрх зөндөө зөрчигдсөн. Үүнийхээ төлөө хөөцөлдөх хэрэгтэй. Маш их дэмжиж, урам зориг өгч та нарыг дэмжсэн. Хүний эрхийн төлөө сайн ажиллах хэрэгтэй. Үнэхээр шаардлагатай гэвэл хүчин төгөлдөр мөрдөгдөж байгаа Хүний эрхийн хуулиа өөрчилж болно. Шалтаг шалтгаан хэлээд ажилламааргүй байна. Та нарыг томилогдсоноос хойш хүний амьд явах, эрүүл мэндээ хамгаалуулах олон эрх зөрчигдөж байхад өөрсдийгөө хамгаалуулах гэж орж ирж байна” гэлээ.