УИХ-ын чуулганы нэгдсэн хуралдаанаар Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төсөл болон хамт өргөн мэдүүлсэн хууль, Улсын Их Хурлын тогтоолын төслүүдийн эцсийн хэлэлцүүлгийг хийж байна. 

УИХ-ЫН ГИШҮҮН Т.ДОРЖХАНД сумдуудыг эдийн засгийн хувьд нь нэгтгэх хэрэгтэй байгаа талаар хэлээд энэ хуулийг ард түмнээрээ хэлэлцүүлсэн юм уу, яагаад асуухгүй байгаа юм бэ. Хүний эрхийн асуудлыг яах юм бэ. Зарим аймгуудад усны асуудал муу байна. Иргэдийн эрхийг яах юм бэ гэлээ. Үүнд УИХ-ын гишүүн Ж.Сүхбаатар “Таны яриад байгаа асуудлыг УИХ-ын олонхийн бүлэг хийж байгаа. Эхний алхам болгож суманд намын бүлэг байгуулахгүй. Та Засгийн газарт саналаа тавьж болно. Тэгээд УИХ-аар шийдэж болно” гэлээ. Харин УИХ-ын дарга орон нутагт захиран зарцуулах эрхийг нь нэмэгдүүлж байгааг тодотголоо. 

УИХ-ЫН ГИШҮҮН Х.ГАНХУЯГ “58.1 заалтыг өөрчлөх хэрэгтэй байна. Орон нутагт төсвийн болон өмчийн эрх мэдлийг нэмэгдүүлэх гэж байгаа. Тэгэхээр улсын төсвөөс татаас авдаг байдлыг болих хэрэгтэй. Ингэж байж сумдууд зөв ажиллана. Төсөв мөнгө нь хүрэхгүй байж сумдын дарга нар ланд 200 унаад явааад байна. Лобби сайтай сумын дарга өр тавиад асуудлаа шийдчихнэ. Дараа нь улсын төсвөөс мөнгөө төлүүлчихнэ. Татвар төлөгчдийн нуруун дээр баахан ланд 200 авдаг, сонгуулийн амлалтаар баахан хүмүүс ажилд авдаг. Хариуцлагаа өндөржүүлэх хэрэгтэй” гэхэд УИХ-ЫН ГИШҮҮН Ж.СҮХБААТАР “Орон нутаг ямар нэгэн татаасгүйгээр бие даан хөгжих тухай ярьж байна. Энэ зөв. Бид улсын төсвөөс бүгд хараат байгаа. Зургаан засаг захиргааны нэгж улсын төсвөөс татаас авдаггүй. Бусад нь татаас авдаг. Судалгаагаар аваад үзэхээр орон нутгийн татварын орлогын бааз суурь их сул байдаг” талаар хэллээ. 

Харин УИХ-ЫН ГИШҮҮН Л.ЭНХ-АМГАЛАН “Т.Доржханд, Х.Ганхуяг нарын гишүүдийн хэлсэн санаа зөв боловч амьдралд буухгүй” болохыг хэллээ. Монгол Улсын бүх сумд татаас авахгүйгээр төсвөө бүрдүүлээд яваад байх боломжгүй гэлээ. Ямартай ч нэгжийн тухай хууль батлагдвал өөрсдөө төсвөө бүрдүүлэх боломж, идэвхи санаачлага нэмэгдэнэ гэв.