Эрчим хүчний зохицуулах хорооны дарга А.Тлейхан мэдээлэл хийлээ. Тэрбээр “Долдугаар сар хүртэлх хугацаанд гэр хорооллын айл өрх цахилгааны 249530, орон сууцанд амьдардаг айл өрх 560 мянгаас 1.1 сая төгрөгийн төлбөрийг төр даана. Харин ЖДҮ 7-30 сая, томоохон үйлдвэр 50-1.4 тэрбум төгрөгийн хөнгөлөлт эдлэх тооцоо судалгаа гарч байна. Тухайлбал, эрчим хүчний төлбөрт нийт дөрвөн тэрбум төгрөг зарцуулна. Үүний 230 тэрбумыг айл өрх, үлдсэнийг нь аж ахуйн нэгжийн төлбөрт зарцуулна. Цахилгаан, дулаан, ус, тогны мөнгийг чөлөөлж байгаа учраас бараа бүтээгдэхүүний үнэ буурах боломжтой” гэлээ.

Тэрбээр “Засгийн газрын шийдвэр гарсан орой цахилгааны ачаалал 18 хувиар нэмэгдсэн. Тиймээс цаашдаа хэрэглээ улам өснө гэж харж байна. Хэрвээ хэрэглээ өсвөл эрчим хүчний салбарт саатал гарна. Өчигдөр орой оргил ачаалал 17.00-21.00 цагийн хооронд байсан. Энэ үед хэрэглээ 1300 мВт хүрсэн. ОХУ-аас манайх өдөрт 245 мВт-ын цахилгаан авдаг. Ингэхэд өдрийн хэрэглээгээ л хангаж байна. Өнөө өглөөний 11.00 цагийн үед 1150 мВт хүрч байна. Энэ нь энгийн үеэс 100 гаруй мВт-аар өссөн үзүүлэлт. Тиймээс иргэдийг хэрэглээгээ огцом нэмэхгүй байхыг уриалж байна. Ялангуяа 17.00-21.00 цагийн хооронд халаагуур залгахгүй байх, үйлдвэр аж ахуйн газрууд хэрэглээгээ 20 орчим хувь бууруулах, нийт хэрэглэгч цахилгааны зарцуулалт бага тоног төхөөрөмж ашиглахыг анхааруулъя” гэлээ.

Мөн өчигдөр орой хэд хэдэн аймагт бага хугацаагаар хязгаарлалт хийсэн. Аль болох ахуйн хэрэглээг хязгаарлахгүй байх чиглэл барьж байна. Хүчин чадал хүрэхгүй бол хязгаарлахаас өөр арга байхгүй. Хязгаарлах бодлого барихгүйгээр хэрэглээг бүрэн хангана гэж тооцож байна. Гэхдээ өдрийн хэрэглээ 1300 мВт-аас илүү гарвал хэрэглээгээ хангах боломжгүй болно. Хүчин чадлаас давбал хязгаарлалт хийхээс аргагүй. Гэхдээ хэрэглээ их байгаа хэсэгтээ л хэсэгчилж хязгаарлалт хийнэ. Түүнээс нийтэд нь хязгаарлаад харанхуй болно гэсэн юм байхгүй гэв.