-ХОТЫН ДАРГА Д.СУМЪЯАБАЗАРЫН ҮЙЛ АЖИЛЛАГААНД “ХАНГАЛТГҮЙ” ГЭСЭН ДҮН ТАВЬЖЭЭ-

“МЭК” компаниас арванхоёрдугаар сарын улс төрийн барометр судалгааг гаргасан байна. Тодруулбал, Монгол Улсын Ерөнхийлөгч Х.Баттулгын улс төрийн рейтинг өнгөрсөн сарынхаас буураагүй байна. Аравдугаар сарын байдлаар түүний рейтинг 6.2 хувь болж өссөн бол арваннэгдүгээр сард 6.1 хувь болж буурсан байна. Харин энэ сард түүний рейтинг тогтвортой байна. Түүний рейтинг тогтвортой байгаа шалтгаан нь өрх бүрд нэг сая төгрөг өгөх уриалга болон монгол бичгийн цахим хичээл гэж үзжээ.

Харин Монгол Улсын Ерөнхий сайд У.Хүрэлсүхийн улс төрийн рейтинг өнгөрсөн гуравдугаар сараас хойш тогтмол буурсан үзүүлэлттэй байна. Тухайн үед түүний рейтинг 7.7 хувьд хүрсэн нь түүхэнд байгаагүй өндөр үзүүлэлт хэмээн дүгнэж байсан. Уг амжилт түүнийг УИХ-ын сонгуульд ялахад нөлөөлсөн хэмээн үздэг. Тэгвэл энэ сарын байдлаар Ерөнхий сайдын улс төрийн рейтинг 5.6 хувь болтлоо буурчээ. Шалтгаан нь УОК-ыг өөрийн биеэр удирдаагүй, айл өрх, аж ахуйн нэгжүүдийн орлого буурсан, Ковид-19 хөл хорионы үед УОК болон НОК-ын харилцан уялдаа холбоогүй шийдвэр мөн Засгийн газрын зарим нэг гишүүдийн үйлдэл нөлөөлсөн гэж үзжээ.

Харин УИХ-ын үйл ажиллагаанд иргэд мөн л “хангалтгүй” гэсэн дүн тавьжээ. Учир нь шинэ парламент байгуулагдсан цагаасаа хойш рейтинг нь буурсаар байгаа юм. Энэ сарын байдлаар УИХ-ын үйл ажиллагаа 3.6 хувь болж буурсан байна. Судалгаанд оролцогчид УИХ-ын зарим гишүүдийн үйлдэл, цар тахлын тархалтын үр дагаврыг бууруулахад идэвхи хангалтгүй байсан, өрхийн орлого огцом буурсан зэрэг шалтгаануудаас болж УИХ-ын үйл ажиллагаанд хангалтгүй гэсэн хариулт өгчээ.

-ОЛОН НИЙТЭД ТААЛАГДДАГГҮЙ УЛСТӨРЧӨӨР П.АНУЖИН НЭРЛЭГДСЭЭР БАЙНА-

Харин хотын дарга Д.Сумъяабазарын улс төрийн рейтинг өнгөрсөн сард 3.4 хувь байсан бол энэ сард 3.1 хувь болж буурсан байна. Мэдээж УОК болон НОК-ын уялдаа холбоогүй шийдвэр, иргэдийн дунд ойлгомжгүй байдал үүсгэсэн зэрэг шалтгаануудаас болж түүний рейтинг буурчээ. 2019 оны 11 дүгээр сард С.Амарсайхан хотын даргаар ажиллаж байх үед түүний рейтинг хамгийн өндөр буюу 4.4 хувьд хүрчээ. Харин түүний дараа Ж.Батбаягалан хотын даргын түр орлон гүйцэтгэгчээр ажилласан. Түүний рейтинг наймдугаар сард 4.3 хувь байсан бол аравдугаар сар хүртэл буурсан үзүүлэлттэй байна.

Өнгөрсөн нэгдүгээр сараас гуравдугаар сар хүртэл олон нийтэд таалагддаг улстөрчөөр Ерөнхий сайд У.Хүрэлсүх нэрлэгдэж байсан бол наймдугаар сараас хойш түүний рейтинг огцом буурчээ. Харин УИХ-ын гишүүн Н.Алтанхуяг арванхоёрдугаар сарын байдлаар олон нийтэд таалагддаг улстөрчийн жагсаалтыг тэргүүлж байна. Мөн шинэ гишүүдээс Т.Доржханд, О.Цогтгэрэл нарт олон нийт “сайн” гэсэн үнэлгээ өгчээ.

Харин олон нийтэд таалагддаггүй улстөрчөөр П.Анужин нэрлэгдсээр байна. Мөн Ерөнхий сайд У.Хүрэлсүх, хотын дарга Д.Сумъяабазар нарыг энэ удаагийн судалгаанд оролцогчид нэрлэсэн байна. Өмнөх судалгаануудын дүнг харвал УИХ-ын гишүүн асан С.Эрдэнэ, Ерөнхийлөгч асан Ц.Элбэгдорж нарт иргэд “дургүй” гэсэн үнэлгээг өгч байжээ.