Хууль зүй Дотоод хэргийн сайд Х.Нямбаатар Эрүүгийн хуульд нэмэлт өөрчлөлт оруулах замаар сэтгүүлчдийн үг хэлэх, хэвлэн нийтлэх эрх чөлөөг боогдуулах, иргэдийн үзэл бодлоо илэрхийлэх замыг хаах хуулийн заалт оруулах гэж байна. Үүнийг сэтгүүлч нар эсэргүүцэж байгаа бөгөөд Монголын Сэтгүүлчдийн нэгдсэн эвлэлээс мэдэгдэл гаргаад байгаа юм. Энэ талаар СНЭ-ийн Ерөнхийлөгчийн үүргийг түр орлон гүйцэтгэгч З.Боргилмаа хэвлэлд өгсөн ярилцлагадаа “Эрүүгийн хуулийн 13.14 дэх буюу Худал мэдээлэл тараах заалтыг нилээн чангаруулж өөрчлөн дэлгэрүүлж, ялын хэмжээг нэмсэн байна. Тиймээс энэ асуудлаар Хууль зүй дотоод хэргийн сайд Х.Нямбаатарт шаардлага хүргүүлж байна. Худал мэдээлэл тараах гэдэг нь худал мэдээлэл тараасан түгээсэн бол нийгмийн сүлжээнд болон хэвлэл мэдээллийн хэрэгслээр ялгаа байхгүй энэ тохиолдолд маш өндөр хэмжээний торгууль ногдуулах, хорих ялаар шийтгэх бодлогыг баримтлаж байгаа нь маш их айдас түрүүлж байна. Учир нь хүний нэр төр Үндсэн хуулиар хамгаалагдсан үнэт зүйл хэдий  ч үгээ хэлэх, үзэл бодлоо илэрхийлэх, итгэл үнэмшилтэй байх эрх нь мөн л Үндсэн хуулиараа иргэнд олгогдсон эрх байдаг. Энэхүү эрхийг ямар нэг байдлаар ёс зүйн хэм хэмжээ, хуулиар баглах тусам эрхийг хэрэгжүүлэх баталгаа хэврэг болдог. Яг ийм үйлдлийг цар тахлын үед мөн иргэдийн сэтгэл зүй айдастай байх үед халхавчилж хийх нь эрсдэлтэй.

Төсөлд тусгаснаар илт худал мэдээлэл түгээсэн гэдгийг ойлгохгүй байна. Хэрэв илт худал мэдээллийг нь шэйр хийсэн хүмүүс мөн эрүүгийн гэмт хэрэгтэн болох гээд байна. Энэхүү үйлдлийг санаатай санамсаргүй давтах юм бол тухайн хүн эрүүгийн давтан гэмт хэрэгтэн болохоор байна. Тиймээс үгээ хэлэх, үзэл бодлоо илэрхийлэх эмзэг асуудал дээр эрүүгийн хуулиар зохицуулах гэж байгаа нь өөрөө маш их айдас түрүүлж байна. Зөвхөн сэтгүүлчдийн асуудал биш нийгмийн сүлжээг ашигладаг иргэн бүрт хамаатай.  Иймд уг асуудлыг эргэж хар гэсэн шаардлагыг хүргүүлж байна. Иргэдийн үзэл бодлыг эрүүгийн хуулиар цензурдэж, эдийн засгийн аргаар боомилох гэж байгаа нь буруу юм” гэлээ.