УИХ-ын чуулганы хуралдаанаар Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төсөл болон хамт өргөн мэдүүлсэн хуулийн анхны хэлэлцүүлгийг хийж байна. 

Энэ үеэр УИХ-ЫН ГИШҮҮН Ц.ТУВААН “Хүний эрхийн баярын өдөр тохиож байна. Гэхдээ энэ өдөр нэг харамсалтай явдал болоод байна. Өнөөдөр хэвлэлийн эрх чөлөө, үг хэлэх эрхээ эдэлсэн сэтгүүлчдийн нэгийг барьж хорьсонд сэтгэл эмзэглэж байна. Энэ хүнийг суллуулах тал дээр УИХ-ын дарга Г.Занданшатар та анхаарч өгөөч. Баянхонгорын гаралтай сэтгүүлч залууг Хүний эрхийг хамгаалах өдөр баривчилж байгаа нь сонин санагдаж байна” гэлээ. 

Харин УИХ-ЫН ДАРГА Г.ЗАНДАНШАТАР “МҮОНРТ-ийн сэтгүүлч Б.Пүрэвийг цар тахлын дэглэм зөрчсөн асуудлаар дуудаж мэдүүлэг аваад явуулсан гэж Цагдаагийн байгууллагаас албан ёсоор мэдэгдсэн. Түүнийг баривчлаагүй” гэсэн тайлбар өглөө.