УИХ-ын чуулганы нэгдсэн хуралдаан үргэлжилж байна. Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төсөл болон хамт өргөн мэдүүлсэн хууль, УИХ-ын тогтоолын төслүүдийн анхны хэлэлцүүлгийг хийж байгаа юм.

УИХ-ын гишүүн Ц.Цэрэнпунцаг: Сумын ИТХ-д улс төрийн намаас нэр дэвшүүлэхгүй гэдэг саналыг дэмжээгүй байна. Анхны төсөл дээр байсан юм. Уг нь ач холбогдолтой асуудал байсан. Цаашид Улс төрийн намын тухай хуульд энэ асуудлыг тусгаж болно гэлээ. Ямар байдлаар шийдэж, суманд байдаг улстөржилтийг арилгах вэ. Энэ хуулийн гол зорилго нь хөдөө аж ахуй, мал аж ахуйн бүтээмжийг сайжруулах гэж ойлгож байгаа. Малын гаралтай түүхий эдийн бүтээгдэхүүн гучин жилийн өмнөх шигээ байгаа. Үүнд орон нутаг дахь улстөржилт нөлөөлж байгаа гэж харж байна. Уг нь дээрх саналыг энэ хуульд тусгах шаардалагатай байсан юм.

УИХ-ын гишүүн Ж.Сүхбаатар: Суман дахь улс төрийн оролцоог хумих дээр олон судлаач санал нэгддэг.  Улс төрийн намууд үүнд бэлэн байгаа эсэх нь эргэлзээтэй. Энэ бол нэгжийн хууль. Улс төрийн намын асуудал руу энэ асуудлыг татан ороцуулахаар нэгжийн хуулийн зохицуулах гэж байгаа харилцаанд асуудал үүсгэж байна. Тиймээс энэ асуудлыг хүчлэн зүтгэхээс түтгэлзсэн. Хоёрдугаарт, УИХ-ын олонх болон цөөнхийн бүлгийнхэн аль аль нь үүнийг дэмжээгүй.