УИХ-ын Эдийн засгийн байнгын хорооны өнөөдрийн хуралдаанаар Эрдэнэсийн сангийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцлээ. Тус хуулийн төслийг УИХ-ын гишүүн Ж.Бат-Эрдэнэ,  С.Бямбацогт,  Л.Мөнхбаатар нар УИХ-д өргөн мэдүүлсэн билээ. 

МОНГОЛБАНКНЫ ДЭД ЕРӨНХИЙЛӨГЧ Г.ЭНХТАЙВАН  “Эрдэнэсийн санд 1.1 их наяд  төгрөгийн 2.7 сая ширхэг эд зүйлс хадгалагдаж байна. Үүнд түүх соёлын хөдлөх дурсгалт зүйлс, алт, мөнгөн гулдмай зоос, Богд хааны үеийн зарим эд зүйлс, угсаатны зүйн эд хэрэглэл болон бусад зүйл хадгалагдаж байгаа. Олон улсын аудитын баг ирж Монголбанкны Эрдэнэсийн санд байгаа зүйлсийн үнэлгээг хийсэн. Сүүлийн хоёр жилийн хугацаанд Эрдэнэсийн санг арвижуулахад хоёр тэрбум төгрөгийн төсөв УИХ-аар баталсан” гэсэн тайлбарыг өгсөн.

Харин УИХ-ЫН ГИШҮҮН Б.ЭНХБАЯР “Эрдэнэсийн сангаас хулгайч нар хумслаад байгаа учраас тэр боломжийг нь хаах зорилгоор оруулж ирж байгаа хуулийн төсөл. Тиймээс хэлэлцэхийг дэмжих ёстой гэж бодож байна. Гэхдээ дагаж орж ирж байгаа Эрүүгийн хуулийн ялын бодлого дэндүү бага байна. Эрдэнэсийн санг эрх бүхий этгээдийн зөвшөөрөлгүй зарцуулсан бол 2.7-14 сая төгрөгөөр торгоно гэж байна. Энэ бол мөнгөөр үнэлэгдэхгүй эд зүйл аваад явсан хүмүүсийн тухай ярьж байгаа. Гэтэл, хоёр гурван хонь хулгайлсан хүнтэй адилхан ял оноож байгаа нь буруу. Мөн байнгын хэсэг дэх эрдэнэсийг худалдсан, шилжүүлсэн, зарсан бол 5-27 сая төгрөгөөр торгоно гэж байгаа. Энэ бас хангалтгүй. Тиймээс хэлэлцүүлгийн шатанд ялын бодлогыг нэмэгдүүлэх саналтай байна” гэлээ