УИХ-ын чуулганы нэгдсэн хуралдаан үргэлжилж байна. Хуралдаанаар 2021 оны улсын төсөвт Ерөнхийлөгчийн тавьсан хоригийг хэлэлцэж байгаа юм.

УИХ дахь МАН-ын бүлгийн гишүүд хуралдаж, Ерөнхийлөгчийн хоригийг хүлээж авах боломжгүй гэж үзсэн. Тэд өнөөдрийн чуулганы хуралдаанаар мөн Ерөнхийлөгчийн хоригийг хүлээж авах боломжгүй гэсэн тайлбарыг хэлж байна. УИХ-ын гишүүн Н.Алтанхуяг “Ардын намынхан бүлгээрээ хэлэлцээд шийдчихсэн байна. Бараг цаг хугацааг дэмий үрж байна” гэсэн бол Ерөнхийлөгчийн зөвлөх Л.Болд “Энэ бол хориг биш сануулга. Өнөөдөр улсын аюулгүй байдлын асуудал яригдаж байна. Өнөөдөр ард түмний амьд явах асуудал яригдаж байна. Улс төр хийж буруу тийшээ яваад байна. Олонх, цөөнх улс төрийн үзэл бодол гэж байхгүй. Өнөөдөр төр 24 цаг ажиллах ёстой. Төсөв танах асуудал яригдаагүй, эрэмбэлэх асуудал яригдаж байна” гэсэн тайлбарыг өгч байсан юм.

Тухайлбал, УИХ-ын гишүүн Б.Жавхлан, Л.Энх-Амгалан "Гишүүд Ерөнхийлөгчийн сануулга гэдгийг хүлээж авч байгаа хэдий ч зарим саналууд нь төсөвт тусгагдсан, бүхэлд нь хоригийг хүлээж авах боломжгүй" гэсэн юм. Харин УИХ-ын гишүүн Т.Доржханд Ерөнхийлөгчийн хориг улс төржсөн байгааг шүүмжлээд, жил бүр тавьж буй хоригтоо алдаа гаргаад байгааг санууллаа.