Коронавирусийн халдвар авсан эсвэл тусгаарлагдсан иргэдийн хүүхдүүд асран хамгаалагчгүйгээр гэртээ ганцаараа үлдэх, "Эцэг эх чинь халдвар тээгч" гэж үеийнхэндээ шоглуулах, амьдардаг байрных нь СӨХ болон оршин суугчид нь гэрт нь оруулахгүй байх, цонх руу нь чулуу шидэх зэрэг дарамт шахалтад өртөх болжээ. Түүнчлэн Сэлэнгэ аймагт л гэхэд эцэг эх нь тусгуурлагдсан 148 хүүхэд асран хамгаалагчгүй болсон байна.

Энэ талаар Гэр бүл хүүхэд залуучуудын хөгжлийн газрын Залуучуудын хөгжлийн газрын дарга О.Сэлэнгэ "Ээж нь коронавирусээр халдварлаж, хоёр хүүхэд нь тусгаарлах байрнаас гарч ирээд Баянзүрх дүүрэг дэх гэртээ очих гэсэн боловч СӨХ болон оршин суугчид нь оруулаагүй тохиолдол гарсан. Тухайн асуудал дээр манай мэргэжилтнүүд ажиллаж байгаа.

Сэлэнгэ аймагт 148 хүүхэд хараа хяналтгүй болсон. Тиймээс бид түр асран хамгаалагчийг сонгох, хажуу хөршид нь хяналтад тавих, шаардлагатай бол түр хамгаалах байрны үйлчилгээ үзүүлж байна. Хүүхэд хамгааллын 108 утсанд өдөрт 500 гаруй дуудлага ирж байна. Эцэг эх нь хөл хорионд орсноос хүүхэд ганцаараа байх, хүүхдэд эрсдэлт нөхцөл бий болох тухай дуудлагууд нэмэгдсэн. 

Түүнчлэн Монгол Улсын хэмжээнд 35 түр хамгаалах байр 250 хүүхдийг хүлээн авах хүчин чадалтайгаар ажилладаг аж.