УИХ-ын Төсвийн байнгын хорооны өчигдрийн хуроалдаанаар Үндэсний аудитын газрын “Шилэн дансны тухай хуулийн хэрэгжилтэд хийсэн аудитын тайлан”-г сонссон. Энэ үеэр УИХ дахь АН-ын бүлгийн гишүүн Д.Пүрэвдорж “Төрийн өмчийн болон орон нутгийн өмчийн хамтарсан 500 гаруй компани байдаг. Энэ компаниуд төрийн өмч биш хувийн өмч болсон. Орон нутгийн өмчит компаниудад тухайн газрын ИТХ болон Иргэдийн нийтийн хурлын сонгуульд ялсан төлөөлөгч нарын сонгуульд явсан хүмүүс нь очиж суудаг болсон. Цүнх барьсан хүнийхээ болон өөрийнхөө хамаатан садан найз нөхдийг аваачиж тонон дээрэмдэж байна. Дураараа дургиж байна. 200 сая төгрөгөөр авсан автомашиныг хоёр жил унаад буцаагаад хувьдаа тавхан сая төгрөгөөр авч байна. Үүнд нь хариуцлага тооцохгүй болохоор идээд, уугаад болоод байна гэж бодоод байна. Үндэсний Аудитын газар хариуцлага тооцох ажлаа хийхгүй байна. Тиймээс Аудитын газар ойрын үед 500 компаниудад шалгалт оруулаад төрөөс татаас авдаг компаниудыг бүгдийг хувьчлах ажлыг хийх ёстой. Төрийн өмч нэртэй хувийн компаниуд бий болоод хэрээс хэтэрлээ” хэмээн шүүмжилсэн юм.