Засгийн газрын хуралдаанаас гаргасан шийдвэрийг танилцуулж байна.

          Энэ үеэр Барилга, хот байгуулалтын сайд  Ц.Даваасүрэн “Засгийн газрын өнөөдрийн хуралдаанаар Орхоны хөндийд Хархорин хот байгуулах ажлыг эрчимжүүлэх чиглэлээр хоёр шийдвэр гарлаа. Нэгдүгээрт, энэхүү ажлыг удирдах Үндэс хороо байгуулж, миний бие ахалж, холбогдох яамдын дэд сайд нар оролцоно. Мөн шинэ Хархорин хотын бүтээн байгуулалтын Захиргааг байгуулж байгаа. Энэхүү Захиргаа нь мэргэжлийн удирдлагыг зохион байгуулж, менежментээр хангах, төслийн хэрэгжилтийн явцад хяналт тавих үүрэгтэй ажиллана. Өнөөдрийн байдлаар газрын бүтэц, хөрс, ус, цаг уурын нөлөөллийг судалж байна. Эдгээр судалгаа дууссаны дараа шинэ Хархорин хот хаана байршихыг тогтооно. Ингэснээр хотын ерөнхий төлөвлөлтийн ажил руу орно. УИХ-аас саяхан 07 дугаар тогтоол гаргасан. Энэ хүрээнд бид гурван ажил хийх ёстой. Нэгдүгээрт, байршлыг тогтоох, газар зүйн судалгаа хийх ёстой. Хоёрдугаарт, хотын төлөвлөлт, гуравдугаарт, хөрөнгийн их үүсвэрийг бий болгох. Тэгэхээр өнөөдрийн хуралдаанаар гаргасан хоёр шийдвэрийн хүрээнд энэхүү хотын ажил илүү эрчимжиж, тухайн ажлыг хариуцах бүтэц нь бий болж байна. Бүтээн байгуулалт эхлэхээр Ерөнхийлөгчийн ордноос эхлэн тухайн хотод байршиж эхэлнэ. Хотын түгжрэлийг сааруулах чиглэлд энэ бүтээн байгуулалтын ажил чухал үүрэг гүйцэтгэнэ гэсэн төлөвлөлттэй ажил явагдаж байна. Урьдчилсан таамгаар 500 мянган хүнтэй хот бий болно гэсэн төсөөлөл бий. Гэр хорооллын түгжрэлийн асуудал, агаарын бохирдол хотын түгжрэлд хамгийн том нөлөө үзүүлж байгаа хэсэг. Бидний ойрын хугацаанд хийх гэж байгаа ажлын нэг бол гэр хорооллын дахин төлөвлөлтийн асуудал байгаа. Нэг талаар хөдөө орон нутагт ипотекийн зээл олголтыг нэмэгдүүлэх чиглэлд ач холбогдол өгнө. Нөгөө талаар шинэ хорооллуудыг бий болгоно. Өндөр байшин, хаус хороолол гээд хоёр төрлийн хороолол бий болно. Өнөөдөр хотын төлөвлөлт, гэр хорооллын асуудалд хүндрэлтэй байгаа нь эрчим хүчний үүсвэр. Ойрын хугацаанд Засгийн газар түгжрэлийн ямар шийдэл гаргахыг зарлана. Дамбадаржаагаас Нисэх хүртэл хурдны зам барихаар ярьж байна, эцэслэн шийдээгүй байна. Ийм маягаар гэр хорооллын төлөвлөлтийг шийднэ. Мөн Яармагт дахин төлөвлөлт хийхээр төлөвлөж байна” гэв.