Түгжрэлийг бууруулах Үндэсний хорооны дарга, хотын сайд Ж.Сүхбаатар цаг үеийн асуудлаар мэдээлэл өглөө. Тэрбээр "Түгжрэлийг бууруулах чиглэлээр хуулийн багц төсөл ирэх хаврын чуулганаар хэлэлцэх гэж байна. Засгийн газарт танилцуулаагүй, Үндэсний хороон дээр эцэслээд явж байна. Түгжрэл бол цогц асуудал. Нийтийн тээвэр, авто замын сүлжээ, олон нийтийн хандлага зэрэг олон асуудал байна. Үндэсний хорооноос 18 багц хуулийг судалж байна. Бид түгжрэлийг захиргаадаад нэг хүнд үүрэг хариуцлага хүлээлгээд яваад байж болохгүйн байна. Хуулийн арга замаар шийдэх ажил байна. Багц хуульд түгжрэлийн бүсийг тогтоох, нийтийн тээврийг хөгжүүлэх, бусад байгууллагын оролцоог хангасан байх зэргийг шийдэх юм. 

        Бид эрх зүйн орчинг бүрдүүлэхээс өмнө нийтийн тээврийн асуудал, шинэ тойрог замын төслийг ярьж байна. Зам дээр нүхэн гарцууд нэмж байгуулна. Мөн замын хөдөлгөөний ухаалаг зохицуулалтын системийг угсраад дуусаж байна. Дөрөвдүгээр сар гэхэд угсарч дуусгах төлөвлөгөөтэй байна. Нэгдүгээр эгнээгээр зорчуулахгүй байхтай холбоотой маргаан гарсан. Цагдаа иргэд аль аль нь харилцаа хандалга дээр анхаарах хэрэгтэй байна.

     Жолоочийн сургалт, жолоочийн цалин хөлс, автобусны терминал, автобазын асуудлууд намайг сайд болохоос өмнө хотын асуудал гээд орхигдсон байсан. Автобусыг ойлгодоггүй хүн бодлого гаргаад, та хэд үүнийг яриад байна. Есдүгээр сараас өмнө төрийн бодлогод энэ асуудал ороогүй байв. Автобусанд сууж үзсэн үү, гэдэг нь хувь хүн рүү чиглэсэн ойлголт. Автобусанд суусан хүмүүс асуудлыг ойлгоод шинэчилсэн нь хаана байна вэ. Нийтийн тээврийг сайжруулаагүй үед хотын хөгжил яриад нэмэргүй.  Нийтийн тээврийн асуудлыг 2023 онд цэгцлэхээр ажиллаж байгаа. Би тойрогтоо 17 автобусны шинэчилсэн. Би автобусанд суугаад явж байхад зорчигч охин намайг танихгүй хаана буух вэ гэж байгаа юм. Үнэхээр цанатсан автобусанд юм харагдахгүй. Шинэ автобусанд суухаар сайхан дуунууд явж байна. Зогсоолоо зарлаж байна. Тэгэхээр автобусны чанарыг сайжруулах шаардлага байна. Сүүлийн үед Сүхбаатар сайд болоод түгжрэл бий болсон мэт яриад байна. Бодлогын сайд бол замын хөдөлгөөний зохицуулалтыг хийнэ" гэлээ.