Хөгжлийн банкны хоёр дахь сонсголын талаар Хөгжлийн банкны Хяналт шалгалтын хорооны гишүүд мэдээлэл өглөө. Хоёр дахь удаагийн сонсголд 100 гаруй хүн гэрчээр дуудах байна. Энэ үеэр хоёр дахь сонсголтой холбоотойгоор зарим сэтгүүлчид асуулт асууж, хариулт авлаа.

-Өмнөх сонсголд зарим хүмүүс гэрчээр дуудсан боловч оролцоогүй. Хоёр дахь сонсголд гэрчээр оролцохгүй бол ямар арга хэмжээ авах вэ?

             -УИХ-ЫН ГИШҮҮН Ж.СҮХБААТАР: УИХ-ын Хяналт шалгалтын хуулийн Ажлын хэсгийн ахлагчаар ажиллаж байсан. Тус хуулиар, гэрч мэдүүлэг өгөхдөө урьдчилаад худал мэдүүлэг өгөх, санаатайгаар зайлсхийсэн тохиолдолд ийм хариуцлага хүлээнэ гэдэгт гарын үсэг зурж байгаа.  Хуулийн дагуу авах арга хэмжээний хүрээнд, албан тушаалтныг Төрийн албаны тухай хуульд зааснаар ажлаас халах хүртэлх арга хэмжээ авна. Эсвэл Зөрчлийн хуулиар арга хэмжээ авна. Харин иргэдийн тухайд, Зөрчлийн хуульд зааснаар 300 нэгжтэй тэнцэх хэмжээний торгууль ногдуулна. Сонсголыг зохион байгуулах хугацаанд дуудсан гэрчүүд ирэхгүй тохиолдолд Хяналт шалгалтын хороо хуралдаад, тухайн хүмүүст Захиргааны арга хэмжээ авах хүртэл асуудлыг шийднэ.

-Өмнөх сонсголоор гаргасан дүгнэлт, хөндөгдсөн баримтаа хуулийн байгууллагад шилжүүлсэн үү. Цаашид ямар үе шаттайгаар асуудлыг шийдэх чиглэлтэй байна. Энэ удаагийн сонсголоор асуудлын хүрээнд ямар ноцтой баримт, мэдээлэл байна вэ?

        -УИХ-ЫН ГИШҮҮН Ж.СҮХБААТАР: Урьдчилан дүгнэлт гэдэг зүйлийг бид гаргахгүй гэж хуульчилсан. Хэргийн үйл явцад оролцож байгаа талууд урьдчилсан дүгнэлт гаргадаггүй. Асуулт нь янз бүрийн хэлбэртэйгээр гардаг. Гурав дахь сонсгол гуравдугаар сард хийгдэж дуусаад УИХ-д танилцуулна. Тэнд шууд дүгнэлт хийгдэнэ.

    -Гэрчээр дуудагдсан Г.Амартүвшин гишүүнийг яах вэ. Тухайн үед Хяналт шалгалтын тухай хуулийн төслийг хамт батлалцаж байсан мөртлөө тэр хуулиа хүлээн зөвшөөрөхгүй, сонсголыг эсэргүүцсэн байр суурьтай бичиг хүргүүлсэн. Үүнийг шүүх тогтооно гэдэг зүйл ярьж байсан?

      -УИХ-ЫН ГИШҮҮН Ж.СҮХБААТАР: Энэ явж байгаа процессыг бид санаачлаагүй. Хөгжлийн банкны асуудлыг иргэд шүүмжлээд, хэвлэл мэдээллийн байгууллага их анхаарал тавьсан. Тэгэхээр тухайн хүн хууль бус гэж байгаа асуудал бол тэр хүний л байр суурь. Энэ бол Үндсэн хуулиар гарсан УИХ-ын Хяналт шалгалтын тухай хуулиар явж байгаа зүйл. Хэн нэгэн дур зоргоор явж байгаа үйл ажиллагаа биш. Энэ Эрүүгийн хэргийн мөрдөн байцаалты хэрэг биш. Олон нийтэд нээлттэй байлгах баримт мэдээллийг ил болгох замаар нээгдэж байгаа үйл явц.

        -ХӨГЖЛИЙН БАНКИЙГ ХЯНАН ШАЛГАХ ТҮР ХОРООНЫ ДАРГА Б.ЭНХБАЯР: УИХ-ын гишүүн Г.Амартүвшин хоёр дахь сонсголд гэрчээр дахин дуудагдаж байгаа.