Засгийн газраас Олон нийтийн сүлжээнд хүний эрхийг хамгаалах тухай хуулийн төслийг УИХ-д өргөн мэдүүлж, хэлэлцүүлэн баталсан. Уг хууль нь хүний үг хэлэх, үзэл бодлоо чөлөөтэй илэрхийлэх Үндсэн хуулиар олгосон эрхийг зөрчиж байнаа хэмээн шүүмжлэл дагуулаад буй. Иймд тус хуульд Ерөнхийлөгч хуулиар олгогдсон эрхийнхээ дагуу хориг тавихаар болсон байна. Энэ талаар Ерөнхийлөгчийн Тамгын газраас мэдээлэл хийлээ.

Ерөнхийлөгчийн зөвлөх А.Бямбажаргал "Олон нийтийн сүлжээнд хүний эрхийг хамгаалах тухай хуулийг УИХ-аар хэлэлцүүлэн баталсан. Уг хуулийг УИХ-ын дарга ёсчлон Ерөнхийлөгчид өргөн мэдүүлсэн байдаг. Ерөнхийлөгч хуулийн дагуу уг хуульд бүхэлд нь хориг тавьсан. 

1. Засгийн газраас уг хуулийг 2023 оны нэгдүгээр сарын 18-нд Их хурлын даргад өргөн мэдүүлсэн. Улмааар өргөн мэдүүлснээс хойш хоёр хоногийн дараа Их хурал энэ хуулийг хэлэлцэн баталсан. Энэ нь хуулийн төслийг боловсруулах, хэлэлцэн батлах хүрээнд иргэд олон нийтийн оролцоог хангаагүй. Хууль ёсны эрх, ашиг сонирхол хөндөгдөж байгаа иргэний саналыг аваагүйн дээр Үндсэн хуулийн 26.2, Хууль тогтоомжийн тухай хуулийн найм дугаар зүйл 8.1.5, 8.1.6, 38 дугаар зүйлийг тус тус зөрчсөн. 
2. Мөн Үндсэн хуулийн 19 дүгээр зүйл, 19.3-т заасан зүйл заалтуудыг үндэслэн эрх эрх чөлөөтэй холбоотой хууль тогтоомжийг хангаж, мэргэжлийн болон судалгааны байгууллагын саналыг авах хэрэгтэй
3. Ерөнхийлөгч хуульд хориг тавих бүрэн эрхтэй. Ерөнхийлөгчид энэ хуулийг нэгдүгээр сарын 26-ны өдөр өргөн мэдүүлсэн. Хүлээн авсан өдрөөс хойш таван өдөрт багтаан хориг тавих зохицуулалттай. Хоёрдугаар сарын 1-ний өдөр  хориг тавих хугацаа дуусаж байгаа. Тэгвэл энэ хуулийн дагаж мөрдөх хугацааг хоёрдугаар сарын 1-ний өдөр буюу Ерөнхийлөгчийн хориг тавих эрхэд халдах байдлаар уг хуулиудыг зохицуулсан байна" гэв.