Хөгжлийн банкны өнөөдрийн сонсголоор ТОСК-ийн "Шинэ Яармаг" хорооллын зээлийг хэлэлцэж байна. Энэ үеэр Хөгжлийн банкыг Хянан шалгах түр хорооны гишүүд гэрчээр дуудсан зээлдэгчдээс  асуулт асууж, хариулт авлаа.

       Хөгжлийн банкны Түр хорооны гишүүн Ж.Сүхбаатар  “Зээлдэгч нь ТОСК гээд төрийн өмчит компаниас мөнгө авна гээд, авсан мөнгөө ямар нэгэн шалгуургүй төсөл хэрэгжүүлэгч гэж татан оролцуулаад өнөөдөр хохирч байна гэж ярьж байна. Тэгээд тэр мөнгийг нь авсан хүн нь “Би Хөгжлийн банкнаас зээл аваагүй” гээд яриад байх юм. Ийм байж болох уу. Үүн дээрээ тайлбар өгөөч” гэв.

      Гэрч Ц.Ууганбаяр “Бидний гуйж, гуйлгаад байсан юм үгүй. Би Худалдаа хөгжлийн банкнаас зээл авсан. Бүр нотлох баримт үлдээсэй гэж бодож хэлж байна. Тухайн үед Хөгжлийн банкны дараагийн удирдлага Батбаяр гэж хүн байсан. Би Батбаяраас бичгээр, амаар уулзаж, “Та нар энэ битүүмжтэй дансанд байршуулсан мөнгөө буцаагаад авчихаа. Би өөрөө арилжааныхаа зээлтэй явья” гэж зөндөө хэлсэн. Харин Хөгжлийн банктай яаж хамааралтай болсон гэхээр  Хөгжлийн банк ТОСК-ийг иргэний шүүхэд өгсөн. Манай компани сайн дураараа шүүхийн ажиллагаанд оролцъё. Манай эрх ашиг энд хөндөгдөөд байна гэсэн хүсэлтийг тавьж оролцсон. Ингэхдээ манайхыг хамтран хариуцагч болж татсан. Тухайн үед Хөгжлийн банк мөнгөө авахдаа манай Худалдаа хөгжлийн банкны зээлийг манай гарын үсэггүй, зөвшөөрөлгүй, манай зээлийг төлөөд аваад явсан байсан. Тиймээс Иргэний шүүхийн шийдвэрийн асуудал үүсээд, хамгийн сүүлд Иргэний шүүхийн шийдвэрийн дагуу бүх төлбөрөө төлсөн. Төлсөн компаниа буруутгаад байвал энэ банканд цаашид хэн зээлээ төлөх юм” гэв.