Хөгжлийн банкнаас санхүүжүүлсэн төсөл, хөтөлбөрийн хэрэгжилт, үр дүн, зээл олголт, эргэн төлөлтийн явцын талаарх сонсгол Төрийн ордонд үргэлжилж байна.

ХЯНАН ШАЛГАХ ТҮР ХОРООНЫ ДАРГА Б.ЭНХБАЯР: "Зэст-Өндөр" ХХК-ийн зээлийг авсан гол хүн болох Эрдэмжаргал захирал яагаад ирээгүй вэ.

"ЗЭСТ-ӨНДӨР "ХХК-ИЙН ГЭРЧ: Манай гүйцэтгэх захирал Эрдэмжаргал 2019 оны сүүлчээр ажлаа хүлээлгэн өгсөн. Шинэ гүйцэтгэх захирал томилогдсон. Энэ зээлийг авахаас нь өдийг хүртэл мэдэж байгаа учраас би төлөөлөн ирсэн. Одоо Эрдэмжаргал захирал хувь эзэмшигч дээр ч байхгүй. Манай компани хоёр хуулийн этгээд гурван иргэнээр эзэмшдэг.

ХЯНАН ШАЛГАХ ТҮР ХОРООНЫ ДАРГА Б.ЭНХБАЯР:  Зэс-Өндөр компанийн хувь эзэмшигч хэн дээр байна вэ. Зэст-Өндөр ХХК Заг компанитай ямар холбоотой вэ. 

"ЗЭСТ-ӨНДӨР "ХХК-ИЙН ГЭРЧ: "Зэст-Өндөр" ХХК-ний  "Сутай ресурс" компанийн 51 хувийг Заг девлопер компани эзэмшдэг. Түүний 90 хувийг Заг компани эзэмшдэг. Заг инженеринг ХХК-тай хамаарал бүхий этгээдээр холбогддог. 

ХЯНАН ШАЛГАХ ТҮР ХОРООНЫ ДАРГА Б.ЭНХБАЯР:  "Зэст-Өндөр" ХХК болон Заг инженеринг компанийн харилцаа хамаарлыг харуулж байна. Шинжээчийн дүгнэлтэд 3.9 тэрбум төгрөг зориулалтын бусаар зарцуулсан байна. Үүнээс хамгийн том дүнтэй нь зээлийн санхүүжилтээс Заг ХК, Заг инженеринг компанийн үйл ажиллагаанд зарцуулсан байна. Ингэхдээ 3.1 тэрбум төгрөг шилжүүлж, хадгаламж барьцаалсан зээл хаасан байна гэдэг дүгнэлт ярьсан. Үүнтэй санал нийлэх үү.

"ЗЭСТ-ӨНДӨР "ХХК-ИЙН ГЭРЧ: Санал нийлэхгүй байна. Тайлбар өгье. Бид Хөгжлийн банкны судалгаанд 2017 оны нэгдүгээр сарын 1-ээс зээлээ судлуулаад бүтэн 18 сар турш явж, зээлийн гэрээгээ байгуулсан. Ингэхдээ "Заг инженеринг" компани нь барилгын дэд бүтцийн компани учраас, дэд бүтцээ хийнэ гэсэн. Ингэхдээ дэд бүтцийн ажил дээр 3.5 тэрбум төгрөг нь цахилгааны ажил, 3.2 тэрбум нь засварын, 1.6 тэрбум төгрөг нь барилга байгууламжийн зээл гэсэн тайлбар мэдүүлэг өгсөн. Нэг асуудал юу гэхээр цахилгааны асуудал дээр Дорнод бүсийн цахилгаан түгэхээс цахилгааны нөхцлөө авч чадаагүй. Энэ хооронд техникийн нөхцөлөө авна гээд түр хадгаламжиндаа 3.4 тэрбум төгрөгийг нь байршуулсан. Хөдөлгөөн хийгээгүй. Улмаар бид хадгаламжинд байсан мөнгөө буцаан авсан.