УИХ-ын гишүүн Э.Бат-Амгалан өчигдөр архидан согтуурсан үедээ Хууль зүйн байнгын хорооны хуралдаанд оролцож, УИХ-ын гишүүн Б.Пүрэвдоржтой маргасан гэх. Тэрбээр “Б.Пүрэвдорж оо, гараад ир. Чамайг ална даа” гэх зэргээр ёс бус авир гаргаж, ёс зүйгүй авирласан гэх мэдээлэл цахим сүлжээнд хөвөрч байгаа билээ.

       Энэ талаар УИХ-ын гишүүн Б.Баттөмөр сэтгүүлчдэд тайлбар өглөө. Тэрбээр “УИХ-ын гишүүн Э.Бат-Амгалантай өглөө уулзаж, юу болсон талаар тодруулсан. Э.Бат-Амгалан гишүн “Би архи уугаагүй. Намайг хэн архи уусан гээд байгаа юм бэ. Би хэвлэлд өөрөө тайлбар, мэдээлэл өгнө. Хууль батлуулах явцад Б.Пүрэвдорж гишүүнтэй маргасан нь үнэн. Гишүүд хоорондоо маргаж л байдаг шүү дээ. Би архи уудаггүй” гэж хэлсэн. Тэгэхээр Э.Бат-Амгалан гишүүнийг архи уусан, хүн заналхийлсэн эсэхийг нотлох л хэрэгтэй. Хэрэв архи уусан Ёс зүйг сахиулах байнгын хороо гурван арга хэмжээ авна. Нэгдүгээрт, сануулах, хоёрдугаарт, уучлалт гуйхыг шаардана, гуравдугаарт, цалингийн 20 хувиар торгох. Харин архидан согтуурсан үедээ хүн заналхийлж, гэмт хэрэгт холбогдсон бол прокурор хэлэлцэж, УИХ-д оруулж ирнэ. Тэгээд УИХ саналыг нь авч хэлэлцэнэ. Ийм л дэг журам, хуультай. Би одоогоор Б.Пүрэвдорж гишүүнтэй уулзаж амжаагүй байна” гэлээ.