Франц Улсын шүүхээс Г.Ган-Очирыг гэр бүлийн хүчирхийлэл үйлдсэн гэх үндэслэлээр хоёр жилийн хорих ял оноогоод байгаа билээ. Тэрбээр эхнэр, хүүхдээ удаа дараа зодсон гэдэг нь нотлох баримтаар нотлогдож, шүүхээс хорих ял оноогоод байгаа талаар албаны эх сурвалжууд мэдээлж байна. Г.Ган-Очир нь “Сонгуулийн саналыг МАН хакердсан” хэмээн мэдээлж, Тагнуулын байгууллагад шалгагдаж байсан гэдгээр нь олон нийт танина.

     Тэгвэл Г.Ган-Очирын эхнэр А.Ариунтуяа мэдээлэл хийгээд байна. Тэрбээр “Г.Ган-Очирын аав хорт хавдрын өвчнөөр нас барсан, хордуулсан гэдэг нь худлаа. Хүүхэд хордуулсан гэдэг нь ч худлаа. Монголд байхдаа салах гэж оролдоход найзын маань гэрийг шатаасан. Хүнийг хоморголон устгах гэсэн хэргээр шалгагдаж, түүнээсээ зугтаж гадаад руу гарсан. Монголын төлөө хуруугаа ч хөдөлгөөгүй. Ард иргэдийг хуурч хандив цуглуулаад байхаар нь боль гэж хэлэхээр намайг зодоод, хөөгөөд гаргадаг. Францад ирээд дөрвөн сар болохдоо би дөрвөн удаа зодуулсан. Хүүхдээ ч хөх няц болтол нь зодсон. Одоо би хамгаалалтанд байгаа учраас бүх үнэнээ хэлж байна. Г.Ган-Очирыг АН-ын дарга С.Эрдэнэ санхүүжүүлж байсан. С.Эрдэнэ Г.Ган-Очирт Нүхтэд хоёр өрөө байр өгч байсан” гэх мэдээлэл өгөөд байгаа юм.

         Энэ талаар АН-ын дарга С.Эрдэнээс тодрууллаа. Тэрбээр “Миний өгсөн гээд байгаа хоёр өрөө байр нь хаана байгаа юм. Хэрэв хоёр өрөө байр өгсөн бол орон сууцны гэрчилгээ, хаяг, байршил нь тодорхой байх ёстой биз дээ. Ингэж хүнийг гүтгэж болохгүй шүү дээ. Би Г.Ган-Очирыг танихгүй. Гэхдээ өмнө нь хоёр удаа уулзаж байсан. Хоёр удаа уулзахдаа надад хар машины талаар толгой эргүүлсэн, утгагүй юм ярьж байсан. Би тухайн үед ярьж байгаа зүйлийг нь ойлгоо ч үгүй. Мөнгө өгч, орон сууцаар хангасан юм огт байхгүй. Хүн хүнтэй нэг уулзаад л хэчнээн сая төгрөг өгнө гэж байхгүй биз дээ. Надад илүүдээ гарсан тийм их мөнгө байхгүй. Хэн нэгний захиалгаар ч юм уу худлаа, үнэн юм ярих шаардлага байхгүй. Хэрэв ярих гэж байгаа бол нотлох баримттай ярих хэрэгтэй” гэлээ.