УИХ-ын гишүүн С.Чинзоригийг Эрүүл мэндийн сайдаар томилох тухай эх сурвалжууд мэдээллээд буй. Тэгвэл энэ талаар тэрбээр байр сууриа илэрхийллээ. Тэрбээр "Эрүүл мэндийн сайдаар ажиллах саналыг Ерөнхий сайд надад тавьсан. Нэгдүгээрт, намайг сайдаар ажиллаж байсан туршлагатай хүний хувьд, хоёрдугаарт, эрүүл мэндийн даатгалын үйлчилгээ салбар руугаа шилжсэн учраас санал тавьж байна гэсэн. Би эрүүл мэндийн салбарын хүн биш учраас бодож үзье гэдэг зүйл ярьсан. Тухайн үед нь хариугаа хэлнэ.

       Энэ бол хоёр талтай асуудал. Сайд бол улс төрийн албан тушаалтан. Тиймээс улс төрийн албан тушаалтан ажиллаж болохгүй гэсэн юм байхгүй. Өнгөрсөн хугацаанд хоёр ч мэргэжлийн хүн удирдлаа. Салбарын сахилга, хариуцлагын асуудал байсаар байна. Эрүүл мэндийн салбарын хүн сайд байх ёстой, тэгвэл үр дүнтэй байна гэдэг нь өрөөсгөл ойлголт юм. Салбарын менежментийн асуудал. Би сайд байна, байхгүй гэсэн хариугаа хэлээгүй байгаа" гэв.