-АН-ын уналтын үед Засгийн газарт ажиллаж байгаа нь тэднийг зориггүй, зангараггүй байх шалтгаан биш байлтай-

УИХ дахь АН-ын бүлгээс “Ниргэсэн хойно нь хашгирав” гэгчээр Ерөнхий сайд У.Хүрэлсүхэд шаардлага хүргүүлжээ. Тус шаардлагад “Удирдлагын хариуцлагагүй үйлдэл, мэргэжлийн бус зохион байгуулалтаас үүдэн дотооддоо коронавирусийн халдварт өвчнийг алдсан” хэмээн Засгийн газар, Улсын онцгой комиссыг буруутгажээ. 

Гол нь халдвар аль хэдийн дотоодод тархаад, долоо хонож байхад хариуцлага нэхсэн хэдэн хуудас шаардлага Засгийн газарт хүргүүлсэн нь инээдтэй бөгөөд энэ намын түүхэн хугацааны хамгийн эмгэнэлтэй жишээ боллоо. Ингэхдээ ердөө Засгийн газрын тэргүүнийг “Ард түмнээсээ уучлалт гуй” гэжээ. Үүний жишээ болгож, бүлгийн дарга Д.Ганбат чуулганы үеэр толгой гудайлган зогсож, ард түмнээс уучлал гуйснаа “УИХ-ын гишүүд дундаас ийм ёс зүй гаргасан нь анх удаа” хэмээн тодотгож, өөрийнхөө нэр хүндийг өргөөд авсан юм.

Уг нь бол коронавирус дотооддоо алдсан явдалд УИХ дахь Ардчилсан намын бүлгийн гишүүд ч буруутай. Тэд өнгөрсөн хугацаанд УИХ-д сөрөг хүчний ажлаа олигтой ч хийж чадаагүй. Эрх баригчдад хяналт тавьж, хийх ажлыг нь сануулж, бурууг шүүмжилж, зөвийг дэмжих сөрөг хүчний үүргээ тэд биелүүлж хараахан дөнгөхгүй байна. Арга ч үгүй биз, эрх баригчдын адил орон нутгийн сонгууль, намын даргын буухиа гээд коронавирусийн халдвар тархах эсэхэд анхаарал хандуулах сөхөөгүй яваа биз. 

-Тэдэнд үр дүн бус тэмцэж байгаа мэт харагдах нь чухал уу-

Түүнчлэн тус бүлгийнхний хийсэн өөр нэг инээдтэй зүйл нь УИХ-ын чуулганаар Төрөөс мөнгөний бодлого баримтлах үндсэн чиглэл, ирэх оны төсөв хэлэлцэх үеэр эсэргүүцэл илэрхийлэн, лоозон барьж, Төрийн ордонд мэдээлэл хийсэн. Тэд элсэн чихэр, будаа, гурил, давс зэрэг өргөн хэрэглээний бараа бүтээгдэхүүнийг Төрийн ордны Чуулганы танхимын гадна дэлгэж, “Иргэдийн цалин, тэтгэвэр нэмэгдээгүй хэрнээ бараа, бүтээгдэхүүний үнэ өсөж байгааг эсэргүүцэж байна. Энэ асуудлыг шат дараатай шийдэхгүй бол тэмцлийн хэлбэрт шилжинэ” гэдгээ мэдэгдэж байлаа. Мөн ирэх оны төсөвт иргэд рүү, баялаг бүтээгчид рүү чиглэсэн хөрөнгө оруулалт тавихыг шаардаж байв. Улмаар төсвийг ийм байдлаар хэлэлцэхгүй бол “Ерөнхийлөгчид ховлож, ирэх оны төсөвт хориг тавиулна” хэмээн МАН-ынхныг “айлгаад” авсан билээ. Гэвч тэдний тэмцэл тэгэсхийгээд намжиж, төсвөө ч тэр чигт нь батлалцсан. Тийм хэрнээ тэд “Ирэх оны төсөв Ерөнхийлөгчийн сонгуульд зориулсан төсөв боллоо” хэмээн сошиалаар хошуу нэмэрлээд авсан.  

-Тэдэн шиг “сул” сөрөг хүчин АН-ын түүхэнд байхгүй-

Ардчилсан намынхан өнгөрсөн хугацаанд хэд, хэдэн удаа сөрөг хүчин байсан. Гэхдээ энэ удаагийнх шиг сул сөрөг хүчин байгаагүй. Жишээ нь, 2000 онд Л.Гүндалай ганцаараа УИХ-д АН-ыг төлөөлсөн хүчтэй сөрөг хүчин байв. УИХ-ын чуулганд даацтай үг хэлж, “гал гарсан” хуралдаан болгож орхидог байв. Гэвч энэ удаагийн сөрөг хүчин 11 гишүүнтэй. Бүлгийн дарга Д.Ганбат өмнө нь Их хуралд сонгогдож байсан туршлагатай ч сөрөг хүчний бүлгийн дарга байхад арай л жижигддэг гэхэд буруудахгүй л болов уу. Түүний үгийг эрх баригчид хүлээж авах нь байтугай иргэд ч тоглоом, шоглоом болгоод өнгөрдөг тал бий. 

Тус намыг төлөөлсөн УИХ-ын дэд дарга С.Одонтуяа бүлгийн эрх ашиг, сөрөг хүчний байр суурь гэхээсээ илүүтэй хувь улстөрчийн амбицаа тэргүүнд тавих нь илүүтэй ажиглагддаг. Энэ парламентад хоёр дахь удаагаа сонгогдсон Б.Пүрэвдорж гишүүн боломж олдвол үг хэлж байгаа харагддаг ч бусад гишүүнээс дэмжлэг авахгүй учраас тэгэсхийгээд намждаг биз. Мөн “Ажнай” гэдгээрээ олонд танигдсан Д.Бат-Эрдэнэ гишүүний амнаас үг унана гэж барагтай л үгүй. Бусад нь энэ удаад шинээр сонгогдсон гишүүд. Үүнээс УИХ-ын гишүүн О.Цогтгэрэл, Ж.Батсуурь, Ц.Туваан нар арай дөнгүүр ч ил гарч, олны хэл амны бай болоод юүхэв гээд тэрүүхэндээ довоо шарлуулж суухыг эрхэмлэдэг гэлтэй. Нэг иймэрхүү нэр төдий хүмүүстэй учраас АН-ын бүлгээс чадалтай битгий хэл арчаатай сөрөг хүчин байхыг шаардах ч ахадсан явдал болчихоод байна.