ХБНГУ-ын “BR24” мэдээллийн сайтад “Герман Улсаас Монгол Улсад хээрийн бэлтгэл хийхээр очсон 25 цэргийн нэгээс халдвар илэрч, эх орондоо ирэх хугацаа нь хойшлогдсон” гэх мэдээлэл өчигдөр буюу 19-ны 13:30 минутад нийтлэгджээ. Түүнчлэн тус сайт “ХБНГУ-аас Монголд очсон цэргүүд нь Афганистан Улсад үүрэг гүйцэтгэх энхийн сахиулагчдыг “Тавантолгой” дахь бэлтгэлийн баазад дадлагажуулах даалгавартай байсан. Улмаар хоёр долоо хоногийн өмнө нутаг буцах ёстой байсан” гэж мэдээлжээ. 

Тэгвэл өнгөрсөн аравдугаар сард ХБНГУ-ын цэргүүд манай улсад ирж, тус сарын 2-30-нд “Монгол-Герман Улсын Зэвсэгт хүчний хамтарсан сургалт” хийсэн нь үнэн аж. Түүнчлэн аравдугаар сарын 20-нд Монгол Улсын Ерөнхийлөгч Х.Баттулга сургалтын үйл явцтай танилцаж, үг хэлсэн юм. Мөн түүнтэй хамт Батлан хамгаалахын сайд Г.Сайханбаяр, Зэвсэгт хүчний Жанжин штабын дарга, хошууч генерал Д.Ганзориг, Монгол Улсын Ерөнхийлөгчийн Аюулгүй байдал, батлан хамгаалахын бодлогын зөвлөх Л.Болд, Монгол Улсын Ерөнхийлөгчийн Гадаад бодлогын зөвлөх Т.Тэгшжаргал, ХБНГУ-аас Монгол Улсад суугаа Онц бөгөөд Бүрэн эрхт Элчин сайд Ёорн Розенберг нар сургалтын үйл ажиллагаатай танилцсан юм. 

 

Одоогоор Герман Улсын цэргүүдээс халдвар илэрсэн нь үнэн эсэх талаар Батлан хамгаалах яамнаас "Ташаа мэдээлэл" гэх тайлбар хийгээд байна. Харин Эрүүл мэндийн яам болон Улсын онцгой комиссоос тайлбар хийгээгүй байна.