Дархан-Уул аймагт коронавирусийн батлагдсан тохиолдол 11:00 цагийн байдлаар 16 болоод байгаа. Коронавирусийн голомт бий болсон учраас тус аймгийн хэмжээнд гурав хоногийн хугацаанд тэг зогсолт хийсэн. Тэг зогсолтын хугацаа маргааш өглөө дуусах бөгөөд өнөө орой тус аймгийн онцгой комисс хуралдаж, тэг зогсолтоо үргэлжлүүлэх эсэхээ шийдэх юм. Түүнчлэн тэг зогсолт хийсэнтэй холбогдуулан гол нэрийн хүнсний бүтээгдэхүүн, эм бэлдмэлийг захиалгаар иргэдэд хүргэж байгаа юм. 

Энэ талаар Дархан-Уул аймгийн засаг даргын орлогч Т.Ганболд "Хүнсний хангамжийн судалгааг гол нэрийн бүтээгдэхүүн дээр гаргаж ажиллаж байна. Одоогоор гол нэрийн бүтээгдэхүүний нөөц хангалттай байна. Харин өндөг, зарим нарийн ногоо зэрэг бүтээгдэхүүн 1-10 хоногийн нөөцтэй байгаа асуудал байна. Гэхдээ нөөцийг нэмэгдүүлэх чиглэлээр ажиллаж байгаа.

Хүнсний бүтээгдэхүүнүүдийн түгээлтийг гурав дахь өдрөө хийж байна. Анхны өдөр 20 гаруй дэлгүүрээр түгээлт хийсэн. 4245 захиалга ирсэн. Өчигдрөөс 96 дэлгүүрээр түгээлт хийж байна. Өнөөдөр 102 дэлгүүр түгээлт хийж байна. 14:00 цагийн байдлаар 897 захиалга авч, 60 хувийг нь хангаад байна. Айл нь хаяг дээрээ олдохгүй байх, халтиргаа ихтэй байх гээд асуудлууд үүсч байна. Иргэд нарийвчилсан захиалга өгөх тохиолдол бас байна. Жишээ нь гоо сайхны бүтээгдэхүүнүүд гэх мэт. Мах, гурил, будаа, сүү, сүүн бүтээгдэхүүн, төмс, хүнсний ногоо, ургамлын тос зэргийг бол асуудалгүй хүргэж байна. Түүнчлэн үнийн хий хөөрөгдөл бий болох эрсдэлтэй байгаа учраас гол нэрийн бүтээгдэхүүнүүдийн үнийн дээд хязгаарыг тогтоох ажил хийгдэж байна. Өнөө орой шуурхай хурлаар хэлэлцүүлнэ" гэлээ. 

Дархан-Уул аймгийн ЗДТГ-ын Нийгмийн бодлогын хэлтсийн дарга Н.Цасчихэр " Бид анх 25 эмийн сангаар үйлчилгээ үзүүлж байсан. Өчигдөр 30 болгож нэмэгдүүлсэн. Хэний өдрийн дуудлага 496 ирж байсан бол өчигдөр 1904 болж нэмэгдсэн. Үнийн дүнгийн хувьд эхний өдөр 3.9 сая байсан бол өчигдөр 17.5 сая төгрөг болсон.