Ерөнхий сайд У.Хүрэлсүх болон УОК-ын дарга, Шадар сайд Я.Содбаатар, Сангийн сайд Ч.Хүрэлбаатар болон танхимын бусад сайд өчигдөр олон нийтэд мэдээлэл хийж, сэтгүүлчдийн сонирхсон асуултад хариулсан билээ. Гурван цагийн хугацаанд иргэдэд тулгамдаад байгаа асуудал болон Засгийн газраас хэрэгжүүлж байгаа арга хэмжээний талаар хангалттай асуулт асууж, хариулт авсан. Гэтэл өнөөдөр УИХ-ын чуулганаар гишүүд өчигдрийн сэтгүүлчдийн асуусан асуултыг бие биеэсээ асууж, Улсын онцгой комиссынхон өнөөх хариултаа л хэлж байна. 

Харин УИХ-ын гишүүн П.Анужин үүнийг шүүмжилсэн юм. Тэрбээр "Бид ингээд хэний ч асуугаад хариулчих асуултыг асуугаад суумааргүй байна. Бид асуудлаа мэдэж байна. Өнгөрсөн гуравдугаар сард Цар тахалын тухай хууль батлагдсан. Гэтэл өнөөдөр банкны зээлийн эргэн төлөлтийг хойшлуулна гэхээс өөр тодорхой мэдээлэл алга. Тодорхой зохицуулалтыг хуулинд нь оруулж өгмөөр байна. Бид өнөөдөр асуулт асуугаад суух биш, амьдралд хэрэгтэй хууль батлах хэрэгтэй байна. Аюулгүй байдлын байнгын хороо яагаад хуралдахгүй байгаа юм бэ гэж Н.Алтанхуяг гишүүн хэлж байна. Энэ байнгын хороогоо хуралдуулаад болохгүй байгаа зүйлийг нь хуулиараа засах хэрэгтэй байна" гэлээ.

Мөн "УИХ-ын гишүүдийн цахим хуралдаан үр дүнгүй болж байна. Гишүүд асуултаа давтаж асуух, тодорхой шийдвэр гаргасан хариулт сонсож чадахгүй байгаа зэрэг асуудал гарсаар байгаа. Тиймээс гишүүд сэтгүүлчдийн ажлыг хийж суухын оронд болохгүй байгаа асуудлаа хуулиар засаж, шийдвэрлэх ажлаа хийх ёстой" хэмээн шүүмжилсэн П.Анужин гишүүнд “Браво” гэж хэлье.