УИХ-ын гишүүд цахимаар хуралдаж байна. Тэд өнгөрсөн долоо хоногт цахимаар хуралдаж, ирэх оны төсвөө баталсан билээ. Харин өнөөдрийн хуралдаанаар халдварт өвчний эсрэг авч буй арга хэмжээний талаар Шадар сайд, УОК-ын дарга Я.Содбаатар болон Сангийн сайд Ч.Хүрэлбаатар нараас асуулт асууж, тодруулж байна. Гишүүдийн хэлснээр “Иргэд тулгамдсан асуудлаа ярьж, их хандаж байна. Орон нутгийн иргэдийг гаргах ажлыг хэрхэн зохион байгуулах вэ. Өнөөдрийн орлогоороо амьдардаг иргэдийг яах вэ. Иргэдэд маск тараах уу” гэсэн асуултуудыг асуусан. Гэвч холбогдох албаныхан тодорхой хариулт өгөхгүй байгааг гишүүд шүүмжилж байна.

Түүнчлэн УИХ-ын гишүүд Төрийн ордонд хуралдаж болдоггүй юм уу гэсэн саналыг Ц.Даваасүрэн гишүүн гаргасан бол Н.Алтанхуяг гишүүн мөн ийм санал хэлж, байнгын хороодыг хуралдуулах шаардлагатай байна гэсэн юм. Тухайлбал, улс орны аюулгүй байдалтай холбоотой асуудал үүсч байхад Аюулгүй байдлын байнгын хороо яагаад хуралдахгүй байгаа юм бэ. Тиймээс Төрийн ордонд гишүүд хуралдах хэрэгтэй байна гэлээ. Тэдний саналыг Ц.Туваан болон хэд, хэдэн гишүүд дэмжиж байгаагаа илэрхийлсэн. Харин Шадар сайд "УИХ-ын гишүүд ч гэсэн вирус тусаж болно. Гишүүд туслах, зөвлөхөө дагуулж явдаг. Одоо бид бүрэн хүрээгээ хумиж чадаагүй учраас хэн нь туссан гэдгийг нь мэдэх боломжгүй байна. УИХ-ын гишүүдийн туслахтай ойрын хавьталд орсон хүн байгаа шүү дээ. Тэднийг шинжилгээнд хамруулчихсан. Энэ улсын онцгой нөхцөл шүү” гэсэн хариулт өглөө.