У.Хүрэлсүхийн Засгийн газарт "Ард иргэдээ гэрээсээ гарч болохгүй" гэдгээс өөр төлөвлөгөө, бодлого үнэндээ алга

Ерөнхий сайд У.Хүрэлсүхийн үгээр бол монголчууд бид яг одоо үхэх, сэхэхийн зааг дээр дайны нөхцөлд гардан тулалдаанд оролцож байгаа. Өнгөрсөн 10 сарын хугацаанд бид бүслэлтэд орж, Засгийн газар маань хориглон хамгаалах тулалдааныг хийгээд ч барсангүй гэв. Улмаар тулалдааны бүсүүд задарч, коронавирус Монгол Улсад нэвтэрчихээд байгаа. “Бид амьд л үлдэх ёстой” хэмээн Засгийн газрын тэргүүн нь олон нийтэд анхааруулав. 

Ерөнхий сайдын хэлснээр Монгол Улс дайнд оролцож байгаа гэж бодъё. Тэгвэл дайны бүслэлтэд 10 сарын турш байсан удирдагч нар яг юу хийсэн бэ. Мэдээж дайнд ялах төлөвлөгөө гаргаж, армийн удирдагчийн хатуу хяналт дор явагддаг байх. Харин манайд ийм төлөвлөгөө бий юү. Анх франц иргэн Монгол Улсад халдвар тээж орж ирснээр бид энэ өвчний аюулыг мэдэрсэн. Бүгд айж, сандралдан хөл хорио тогтоож, хоол хүнсээ базаасан билээ. Азаар дотооддоо халвар тархаагүй ч “Аюул ойрхон байгаа шүү” гэдгийг хэн, хэн нь тэгэсхийгээд мартсан. Тухайн үед Засгийн газраас хөл хорио тогтоож, аж ахуйн нэгжүүд хаалгаа барьсан. Хоёр сар гаруй үргэлжилсэн хөл хорио жижиг аж ахуйн нэгж, иргэдэд асар их дарамт болсон билээ. 

Энэ үеэр УИХ-ын 2020 оны сонгууль болж Засгийн газраас хэд, хэдэн шийдвэрийг гаргасан. Тухайлбал, хүүхэд бүрт 100 мянган төгрөг олгох, нийгмийн даатгал, зээлийн эргэн төлөлтийг хойшлуулах зэрэг шийдвэр гаргасан нь иргэд, аж ахуйн нэгжүүдэд нэмэр болсон гэж үздэг. Гэвч энэ хангалттай байгаагүй. Сонгуулийн шоу, иргэдэд таалагдах гэсэн шийдвэр байсан гэхэд хилсдэхгүй.  Гэтэл 10 сарын хугацаанд нөхцөл байдал улам хүндэрч, дэлхий нийтээрээ халдварын хоёр дахь давлагаанд өртөж, олон зуун сая хүний амь насыг авч одсоор байна. Гэвч өнгөрсөн хугацаанд манай улс хоёр шатны сонгуулиа амжилттай зохион байгуулж, өчнөөн тэрбум төгрөгөөр наадам хийж, дарга, цэрэггүй амарцгаасан билээ. Уг нь дайны бүслэлтэд байгаа улс орон байнгын бэлэн байдалд байж, халдварт өвчин ороод ирлээ гэхэд иргэдээ яах вэ, эдийн засгаа хэрхэн барих вэ гээд цаасан дээр батлагдсан төлөвлөгөөтэй байх ёстой. Гэвч Засгийн газарт тийм төлөвлөгөө байсангүй. Өдрийн орлогоороо амьдралаа залгуулдаг иргэдээ яах вэ гэдэг асуултад ч хариулт өгч чадахгүй байна. 

Тэгвэл коронавирусийн бүслэлтэд 10 сарын турш байсан удирдагч нар яг юу хийсэн бэ. Мэдээж дайнд ялах төлөвлөгөө гаргаж, армийн удирдагчийн хатуу хяналт дор явагддаг байх. Харин манайд ийм төлөвлөгөө бий юү 

Ерөнхий сайд нь сүржин үгтэй мэдэгдэл хийж иргэдийг айлган, танхимын гишүүдээ зандарч сүрийг үзүүлэв. Тэрбээр хүүхдийн 100 мянган төгрөгөө үргэлжлүүлэн олгоно, нийгмийн даатгал, зээлийн төлбөрийг хойшлуулна гэсэн өмнөх шийдвэрээ л танилцууллаа. Уг нь иргэд Засгийн газрын тэргүүнээс илүү зүйл хүлээж байсан. Өрхийн орлогыг хэрхэн дэмжих, аж ахуйн нэгжүүдээ дампууруулчихгүй хэрхэн авч үлдэх, өнөө, маргаашийн хэрэглээгээ арай ядан олж байгаа иргэдээ яах вэ гээд амьдралд буусан бодитой шийдвэр хүлээж байв. Гэтэл Засгийн газар “Улс мөнгөгүй, боломжгүй” гэсээр хурлаа дуусгасан билээ. 

Өнөөдөр гэнэтхэн халдварт өвчин ороод ирсэн юм шиг сандралдаж, дарга нар нь хоорондоо ямар чуялдаа холбоогүй шийдвэр гаргаж байгаа нь тэдэнд ямар ч төлөвлөгөө байхгүйг харуулж байна. Өглөө гаргасан шийдвэрээ орой нь цуцалж, олон хүн бужигнуулж болохгүй гэж хэлчихээд өөрсдөө тэр ажлаа зохион байгуулж байна. Яг үнэндээ Засгийн газарт “Иргэдээ гэрээсээ битгий гар” гэж хэлэхээс өөр төлөвлөгөө алга. Хэрвээ иргэдэд тулгараад байгаа тэр асуудлыг шийдэж чадах мэдэгдэл хийсэн бол иргэд өнөөдөр гэртээ санаа амар суух байлаа.