• Өнөөдөр 2026-09-06

Төмөр торны цаана суугаа төрийн түшээд

2020-11-18,   1178

-Тэднээр “эрх мэдэл, албан тушаалаа урвуулан ашигласан” гэх эгэл иргэдийн боломжийг хулгайлсан гэмт хэрэг дуусаасай. Магадгүй, энэ л тэдний ард түмний өмнө гэмээ цайруулах боломж- 

 
“...Хоригдлууд коронавирусээр төдөн хүн өвдсөн гээд тоо уралдуулж байна. Гадаад орчноос таслагдсан бидэнд мэдэх юм алга. Дэмий л санаа зовох юм. Хүйтэн орон дээр удаан сууж юм бичлээ. Нуруу хөших шинжтэй. Энэ зуур торны завсраар болжмор орж гарч байгаа харагдана. Тэднийг хооллочихоод хөнжил дотроо хэвтэхээс...”.
 
Энэ бол Ерөнхий сайд асан М.Энхсайханы өдрийн тэмдэглэлийн хэсэг. Яг энэ хэсгийг тэр 461 дүгээр ангид “Хорлон сүйтгэх” зүйл ангиар хоригдож, шүүх хурлаа хүлээж байх үедээ буюу өнгөрсөн дөрөвдүгээр сарын 25-ны үд дундад бичжээ. Харин тэр долоо хоногийн өмнө Улсын дээд шүүхийн хяналтын шатнаас дөрвөн жилийн хорих ялтай улс төрийн хоригдол болсон. Хоригдол болсон анхны бөгөөд сүүлийн улстөрч ч биш. 
 
Улстөрчдийн туг барих, тугал хариулахын хооронд хуруу дарам зай байдгийг бид энэ хулгана жилд олон харж байна. УИХ-ын гишүүн асан, МУГЖ С.Жавхлан өнгөрсөн намар тоглолтоо хийх үеэрээ “Улстөрчид гишүүний суудлаасаа буугаад шорон явдаг бол би тайзан дээрээ ирж байгаа биз дээ” хэмээн цаанаа л нэг ёжтой мушилзсан шиг. 
 
       Өдгөө шоронд Ерөнхий сайд асан гурав, салбарын сайд асан тав, УИХ-ын гишүүн асан хоёр хоригдож байна. Тухайлбал, Монгол Улсын 18, 25, 29 дэх Ерөнхий сайд буюу М.Энхсайхан дээр бичсэнчлэн дөрвөн жил, С.Баяр таван жил, Ж.Эрдэнэбат зургаан жилийн ялтай хоригдож буй. Мөн Аж үйлдвэрийн сайд асан Д.Эрдэнэбат дөрвөн жил зургаан сар, Сангийн сайд асан С.Баярцогт 10 жил, Сангийн сайд асан Б.Болор гурван жил зургаан сар, Хөдөлмөр, нийгмийн хамгааллын сайд асан Н.Номтойбаяр таван жил таван сар, Шадар сайд асан Да.Ганболд дөрвөн жил, УИХ-ын гишүүн асан Д.Дамба-Очир гурван жил зургаан сар, УИХ-ын гишүүн асан Г.Солтан гурван жилийн ялтай шоронд байгаа. Ер нь бол УИХ-ын нийт 10 гишүүн 3.6-10 жилийн ялтай шоронд байгаа гэсэн үг л дээ. 
Улстөрч асан, нийтлэлч Баабарын тоолсноор бол өнөөгийн улстөрчдөөс дахиад 14 эрхэм шоронд орох болзол хангаад буй гэх юм билээ. 
18 дахь Ерөнхий сайд М.Энхсайханы хувьд “Таван толгой”-н нүүрсний ордын төслийн нэгжийг удирдаж байхдаа эрх мэдэл, албан тушаалаа урвуулан ашигласан, хөрөнгө оруулагч талд ашигтай байдал бий болгосон, энэ үйлдлээрээ хүн амын амьдралыг хангах үйл ажиллагааг доголдуулж, хорлон сүйтгэхийг завдсан гэж давхар яллуулсан. Мөн түүнийг 130 сая төгрөгөөр албан хэрэгцээндээ автомашин худалдаж авсан нь улсад хохирол учруулсан гэж буруутгасан байдаг. 
 
25 дахь Ерөнхий сайд С.Баярын хувьд Ерөнхий сайдаар ажиллаж байхдаа албан тушаалын байдлаа урвуулан ашигласан буюу “Петровис”-ын шатахууныг "Оюутолгой"-д шахсан, АНУ-д хууль бусаар олон тооны үл хөдлөх хөрөнгө худалдан авч, мөнгө угаасан хэргээр ял сонссон. Одоо 409 дүгээр хорих ангид биеийн байдал нь тааруухан байгаа гэх шуум явж буй.  
 
29 дэх Ерөнхий сайд Ж.Эрдэнэбат мөн л эрх мэдэл, албан тушаалаа урвуулан ашигласан хэргээр “аавын хаалга” татсан. Түүнийг Ерөнхий сайдаар ажиллаж байхдаа Өмнөговь аймгийн Гурвантэс сумын нутагт байх “Улаан сайр-2” хэмээх 1463.82 га талбайг төрсөн дүүтэйгээ хамтран эзэмшдэг компанийнхаа нэр дээр таван сая төгрөгөөр худалдан авч, зургаан сарын дараа уг тусгай зөвшөөрлөө “Алтай констракшн” ХХК-ийн захиралд худалдсан хэргээр ялласан юм. Түүнийг Ерөнхий сайд асан С.Баяртай нэг ангид хорьж байгаа гэх. 
 
Улстөрчөөс хоригдол болсон бусад долоогийнх нь хувьд мөн л албан тушаал, эрх мэдлээ урвуулан ашигласан, бусдад давуу тал бий болгож, дундаас нь ашиг хүртсэн, хамаарал бүхий этгээдийнхээ компанийг хууль бусаар дэмжсэн зэрэг гэмт үйлдлээр ял авсан юм.  

Тэд нэгэн цаг үед брэндийн хослолоор гангарч, үнэтэй байранд амьдарч, тансаг машин унаж, цаг үргэлж туслах, зөвлөх, хамгаалагч араасаа дагуулж, тансаг ресторанд ижил зиндааны “томчууд”-тай зоог барьж, Төрийн ордонд заларч, гадагшаа аялж, хамаарал бүхий хүмүүсээ өөд татаж, таарсан хүн бүртээ алга тосуулан хүндлүүлж явсан. Энэ ч яах  вэ. Бүхий л томчуудын хэрэглээ, өдөр тутмын хэв маяг. Гол нь одоо ямаршуухан суугаа бол...

        Эхэнд бичсэн М.Энхсайханы өдрийн тэмдэглэлээр, эсвэл шорон гэх утгаар нь төсөөлбөл тэд өдийд өргөст тортой хашаанд тодорхой цагаар салхилж, бүдэг гэрэлтэй умгархан өрөөнд дан гудастай нааран дээр суугаад ном бичиж, эсвэл ном уншиж байгаа. Бас оройн хоолонд юу өгөхийг, хэзээ эргэлт ирж, шинэ, сонин мэдээ дуулгахыг хүлээж суугаа байх. Эсвэл ар гэрээсээ, албан тушаалд байхдаа гарыг нь ганзганд хүргэсэн дүү нараасаа өдөр тутам хангалт аваад, бүрэлдээд удаагүй парламентын “шинэков”-ууд цар тахлын хямралд хэрхэн мунгинаж буйг телевизээр үзэж, сонингоор гарчиглаж, твиттерийн жиргээнээс уншингаа тансаг сууж байж ч болох. Аль нь ч байлаа тэд эрх чөлөөгөө хасуулсан хүмүүс.
Гар хөлийнх нь үзүүрүүд гадаа үйл хэргийг нь үргэлжлүүлээд явж байж болох ч тэд өөрсдөө дөрвөн хананы дунд л байгаа. 
Гурван Ерөнхий сайд, салбарын таван сайд, хоёр гишүүн хоёрхон улирлын дотор хоригдол болсон энэ үйл явдал улс төрийн түүхэнд тод хараар бичигдэж үлдэнэ. Чухал нь тэд зүгээр ч нэг хоригдоогүй байгаасай. Өөрөөр хэлбэл, улсын мөнгөөр түрийвчээ түнтийлгэвэл, хамаарал бүхий хүмүүсээ төсвийн мөнгөөр эрхлүүлбэл, эрх мэдлээ амин хувийн ашиг сонирхолдоо ашиглабал албан тушаалын зөөлөн суудлын доор шоронгийн хатуу наар хүлээж байдгийг бусад “шинэхэн” улстөрчид үлгэрлэсэн байгаасай. Тэднээр “эрх мэдэл, албан тушаалаа урвуулан ашигласан” гэх эгэл иргэдийн боломжийг хулгайлсан гэмт хэрэг дуусаасай. Магадгүй, энэ л тэдний ард түмний өмнө гэмээ цайруулах боломж. 
 

Төмөр торны цаана суугаа төрийн түшээд
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188
[email protected]
2026 © Зохиогчийн эрх хуулиар хамгаалагдсан. Мэдээлэл хуулбарлах хориотой.