Бүх нийтийн хатуу хөл хориог ирэх сарын 1 хүртэл сунгах Засгийн газрын шийдвэр гаргасан. Гэвч иргэд, аж ахуйн нэгжүүд банкны зээлийн төлөлт, түрээсийн төлөлтөө хэрхэн хийх талаар шийдвэр хүлээж буй юм. Ерөнхий сайд У.Хүрэлсүх Банкны бүх төрлийн зээлийн эргэн төлөлт, түрээсийн харилцааг хойшлуулах талаар Сангийн сайдад үүрэг чиглэл өгсөн байна. Энэ талаар Шадар сайд Я.Содбаатар "Аж ахуйн нэгжүүдэд хэрхэн дэмжлэг үзүүлэх вэ, боломж ямар байгаа вэ гэдгийг судлаад Засгийн газрын хуралдаанд оруулна. Ирэх гурав дахь өдөр шийдвэр гарна. Иргэдийн зээлийн асуудал, түрээсийн асуудал яригдаж байна. Гэхдээ иргэдийн эрүүл мэнд хамгийн түрүүнд байх ёстой.  Төсөв мөнгөний нөхцөл байдлаа гаргаж байгаад тодорхой шийдвэр гаргана. Сангийн яаманд ажлын хэсэг гарсан ажиллаж байна" гэлээ.