Улсын онцгой комисс өнгөрсөн шөнө яаралтай хуралдаж, Монгол Улсын Шадар сайд, УОК-ын дарга Я.Содбаатар КОВИД-19 цар тахлаас урьдчилсан сэргийлэх зорилгоор нийслэлээс гарах хот хоорондын зорчигч тээвэр болон хувийн тээврийн хэрэгсэл, орон нутгийн хуваарьт нислэг болон галт тэрэгний хөдөлгөөнийг 11 дүгээр сарын 11-ний өдөр буюу өнөөдрөөс энэ сарын 13-ны өдрийн 23:00 цаг хүртэл түр зогсоож холбогдох арга хэмжээг авч ажиллахыг Зам тээврийн хөгжлийн сайд Л.Халтар болон ЦЕГ, МХЕГ, хотын удирдлагуудад үүрэг болгосон байна. Одоогийн байдлаар Улаанбаатар хотоос гарах хөдөлгөөнийг хаагаад байгаа бөгөөд хот руу орох тээврийн хэрэгслийг нэвтрүүлж байгааг албаныхаан хэлж байна.

Мөн нийслэлийн бүх шатны сургууль, цэцэрлэг, сургалтын төвийн үйл ажиллагааг гурав хоногийн хугацаанд хаах үүргийг өгчээ. Түүнчлэн үзвэр, үйлчилгээ, олон нийтийг хамарсан үйл ажиллагаа, тэмцээн уралдаан, кинотеатрын үйл ажиллагааг түр зогсоох шийдвэр гаргалаа.