"Оюутолгой" компанийн Төлөөлөн удирдах зөвлөлийн хоёр гишүүнээр Э.Баясгалан, З.Ган-Очир нарыг өчигдөр томилсон билээ. Тодруулбал, Э.Баясгалан нь “Морган Стэнли” компанид Татварын аналистаар ажиллаж байсан бол З.Ган-Очир нь “Аспайр Майнинг” компанийн гүйцэтгэх захирлаар ажиллаж байсан юм. УИХ-ын гишүүн Ц.Цэрэнпунцаг “Аспайр Майнинг” компанид хувь эзэмшдэг бөгөөд компанийн захирлаар ажиллаж байсан хүнээ Оюутолгойн ТУЗ-д оруулсан гэх яриа гараад байгаа юм. Тэрбээр энэ талаар хэлэхдээ “Би Засгийн газрын томилгоонд огт оролцоогүй. З.Ган-очир гэдэг хүнтэй ажил хэргийн шугамаар ганц, хоёр удаа уулзаж байсан. Сүүлийн жил гаруй хугацаанд тэр хүнтэй уулзаагүй. Ийм томилгоо болсныг сэтгүүлчдээс л мэдлээ. З.Ган-Очир компанид ажиллахаа болиод удаж байгаа. Хувьцаагаа зараад дуусч байгаа юм билээ. Тэгэхээр бүр хамааралгүй болох биз” гэлээ.