МАН-ын Ерөнхий нарийн бичгийн дарга Д.Амарбаясгалан НИТХ-ын даргын албан тушаалд Ж.Батбаясгалан, Нийслэлийн Засаг дарга бөгөөд Улаанбаатар хотын захирагчаар УИХ-ын гишүүн Д.Сумьяабазар нарыг санал болгож байгаа талаар танилцуулсан.

МАН-ын генсек Д.Амарбаясгалан “УИХ-ын гишүүнээсээ татгалзах улстөрчийн хувьд хүнд шийдвэр. Биднийг нийслэлчүүдийн итгэлийг ажил хэрэг болгон мөрийн хөтөлбөрөө хэрэгжүүлэх чухал хариуцлага хүлээж байна. Бидэнд Ерөнхийлөгчийн сонгуульд ялагдал хүлээж байсан гашуун түүх бий. Ирэх жил биднийг намын 100 жилийн ой, Ерөнхийлөгчийн сонгууль гэсэн маш том хоёр үйл явдал хүлээж байна. Иймээс Д.Сумъяабазар даргыг намын зүгээс итгэл хүлээлгэн илгээж байна. Хотын дарга УИХ, Засгийн газарт хүртэл ажиллаж чадах зангарагтай, чадвартай хүн байх ёстой. Улс төрийн туршлага, мэдлэг чадварыг нь ашиглах гэж бид өөрөөр нь энэ хүнд шийдвэрийг гаргуулсан” гэлээ.

Үүний дараа Нийслэлийн МАН-ын хорооны V хуралдаан Төрийн ордонд эхэлж, УИХ-ын гишүүн, Нийслэлийн МАН-ын дарга Д.Сумъяабазарыг хотын даргад, Ж.Батбаясгаланг НИТХ-ын даргад 100 хувийн саналаар дэмжсэн байна. Нийслэлийн МАН-ын хорооны V хуралдааны дараа нийслэлийн МАН-ын хуралдаан Тусгаар тогтнолын ордонд, үүний дараа МАН-ын Удирдах зөвлөлийн хуралдаан Төрийн ордонд болох юм байна. Д.Сумъяабазар нь УИХ-ын гишүүнээр ажиллаж байгаа.  Хэрэв хотын даргаар томилогдвол УИХ-ын гишүүний үүрэгт ажлаа хүлээлгэн өгөх ёстой болж байна. Ингэснээр Сонгинохайрхан дүүрэгт нөхөн сонгууль явагдах нөхцөл бүрдэх юм.