Монгол Улсын Ерөнхийлөгч асан Ц.Элбэгдорж Ардчилсан намын гишүүнчлэлээ сэргээлээ. Тэрбээр 2009 онд Монгол Улсын Ерөнхийлөгчөөр сонгогдсоныхоо дараа намын дүрмийн дагуу гишүүнчлэлээсээ түдгэлзээд байсан юм.

Удаа дараагийн сонгуульд ялагдал хүлээсэн Ардчилсан нам сөрөг хүчний үүргээ ч хангалттай биелүүлж чадахгүй байгаа гэж хэлж болно. Орон нутгийн сонгуулийн дараа намын даргаа сонгоно гэх мэдэгдлийг намын гишүүд нь хийж байсан. Одоогоор тус намын даргын үүрэг гүйцэтгэгчээр УИХ-ын гишүүн Ц.Туваан ажиллаж байгаа юм. Ардчилсан намын шинэчлэл, намын даргын асуудал яригдаж эхлэх энэ үеэр Ерөнхийлөгч асан Ц.Элбэгдорж  намын гишүүнчлэлээ сэргээж байгаа нь намын удирдлагыг гартаа авах гэсэн санаархал байж болохыг үгүйсгэхгүй юм.

Тэрбээр энэ үеэр “Намын гишүүнийхээ хувьд намынхаа үйл ажиллагаанд идэвхтэй оролцоно” гэдгээ хэлсэн. Нөгөөтэйгүүр ирэх онд Ерөнхийлөгчийн сонгууль болно. Сонгуульд дахин нэр дэвших үү гэсэн сэтгүүлчийн асуултад “Эх орон дуудвал бид очих үүрэгтэй. Одоо бол жирийн иргэний хувиар намын, улс орныхоо үйл ажиллагаанд идэвхтэй оролцоод явна” гэсэн хариулт өгсөн юм. Ерөнхийлөгч асан Ц.Элбэгдоржийг хуулийн байгууллага шалгасан хэвээр байгааг мөн энэ үеэр хэллээ.