Н.АЛТАНХУЯГ: Хөдөлмөрлөсөн хүн л мөнгө авдаг баймаар байна

Б. Бадралмаа:
Улс төр

2021-10-17, 417

УИХ-ын гишүүн Н.Алтанхуягаас цаг үеийн асуудлаар цөөн асуултад хариулт авлаа.

-2022 оны төсвийн төслийг УИХ хэлэлцэж байна. Засгийн газраас боловсруулсан төсвийн төслийг та хэрхэн дүгнэж байна вэ. Эдийн засгаа сэргээх бодлого байж чадах уу?

-Нэг жил бид Их хуралд суулаа. Манай гадаад өр маш их байна. Төсвийн алдагдал өндөр байна. Ирэх онд 18 их наяд төгрөгийн зарлага гаргаж, 16 их наядын орлого олно гэсэн байна лээ. Дахиад л хоёр их наядын алдагдалтай төсөв орж ирсэн. Тэгэхээр энэ мөнгөө гаднын зээл тусламжаар л нөхнө гэсэн үг. Халамжаас хөдөлмөрт гэсэн гоё нэртэй төсөв харагдана лээ. Гоё зүйл ярих яах вэ. Тэр лоозонгоосоо татгалзаж, зөв бодлого баримтлах нь чухал. Хөдөлмөрлөсөн хүн л мөнгө авдаг баймаар байна.

-Ирэх онд Засгийн газарт хоёр яам, дөрвөн агентлаг байгуулах шаардлагатай хэмээн төсөвт санхүүжилтийг тусгасан байна. Та энэ талаар ямар байр суурьтай байгаа вэ?

-Хэрэгцээ шаардлага байна гээд хоёр яам байгуулах талаар орж ирж байгаа юм байна. Ерөнхий сайдын хажууд л яам байгуулах нь зөв. Тэгэхгүй бол Ерөнхий сайдаасаа хол тэгээд л байшин сав бариад байх шаардлагагүй. Мэдээллийн технологийн асуудал чухал нь чухал. Гэхдээ яам байгуулчихвал энэ асуудал Ерөнхий сайдаасаа холдоод явчих нь.

-Одоогийн эдийн нөхцөл байдлыг та хэрхэн харж байна вэ. Засгийн газрын үйл ажиллагааг та хэрхэн дүгнэж байгаа бол?

-Засгийн газар нэг сайн зүйл хийсэн. Тэд хүү багатай зээлийг аж ахуйн нэгжүүдэд өгч, үйл ажиллагааг нь дэмжсэн. Цаашид Засгийн газар авах ёстой зээлийг нь хүрэх ёстой хүмүүст нь хүргэх дээр анхаарах хэрэгтэй. Хүртээмжээ нэмэгдүүлэх шаардлагатай.

-Та сая тойрогтоо ажиллаад ирсэн. Танай тойргийн иргэдэд тулгамдаж байгаа асуудал юу байна вэ?

-С.Ганбаатар гишүүн бид хоёр тойрогтоо ажиллаж, иргэдийнхээ санал бодлыг сонсоод ирлээ. Иргэдийн хэлж буй саналын 80 орчим хувь нь орон нутгийн шинжтэй байлаа. Тухайлбал, дулаан цахилгаанаа хэзээ өгөх бол гэх мэт асуудлууд байсан. Харин 20 орчим хувь нь УИХ-д хэлэлцүүлж байгаа хууль тогтоомж, гарч байгаа бодлого, хэрэгжилтийн талаар асуудал хөндөж байсан.

Н.АЛТАНХУЯГ: Хөдөлмөрлөсөн хүн л мөнгө авдаг баймаар байна

Шинэ мэдээ

Нийтлэлчид