Төрийн албыг төрлийнх байлгахыг эцэслэж, нийгэмд шударга ёс тогтооно хэмээн УИХ-ын даргаа огцруулж асан Л.Оюун-Эрдэнэ тэргүүтнүүд өөрсдөө “М.Энхболд” болох цагаар

Эрх мэдэл, албан тушаал нь мөнх байх юм шиг санаж, Монголын бүх шатны албан тушаалд өөрийн гэх тодотголтой хүмүүсээ томилж, мэргэжлийн, чадварлаг боловсон хүчнүүдийг зориуд шахан зайлуулж, ах, дүүсээ ажлын байраар ханган даналзаж яваа МАН-ын эрх мэдэлтнүүдэд сануулах нэгэн үйл явдал байна. 

Тун саяхан Миеэгомбын Энхболдгүйгээр МАН-ыг, Монголын улс төрийг төсөөлөхөд бэрх байлаа. Түүнгүй шийдвэр, түүний оролцоогүй үйл явц, түүний мэдээгүй улс төр хийгээд заримдаа бүр хувийн хэвшилд ч томилгоо хийгддэггүй байлаа. Шүүх, прокурор, хууль хяналтын сүр хүчний талаар бүр ярих ч юм биш.

Үүнийх нь сүүдэрт багтах гэсэн намынх нь дүү нар тал талаас нь бүчин, түүний эрх мэдлийн цар хүрээг улам томруулж байгаа мэтээр нэрийнх нь дор бүгэж байсан билээ. Гэвч “Өрөм дотроосоо өтдөг”-ийн үлгэрээр тэнхээтэй байхдаа нөмөртөө багтаасан дүү нар нь түүнийг жагсаал цуглаан хүртэл зохион байгуулж, адгийн муугаар татан унагаж, улс төрөөс бараг бүр мөсөн зайлуулсан нь ердөө хоёрхон жилийн өмнөх явдал.

Одоо ч М.Энхболдын гар хөл, ойр дотны хань хамсаатан, ах дүүсийг нь төрийн хийгээд улс төрийн албанаас нь шахан зайлуулах, хүчгүйдүүлэх ажиллагаа үргэлжилсээр байгаа билээ. Энэ удаагийн Орон нутгийн сонгуулиар ч энэ ажил идэвхтэй өрнөж, М.Энхболдын гэх харьяалалтай бүхний боломжийг МАН-ын өнөөгийн лидерүүд хааж, боосоор байгаа нь олонд ил байна. 

Өөрөөр хэлбэл, хэр хүчтэй, хэр их эрх мэдэлтэй явсан тэр хэмжээгээрээ дахин өндийх тэнхэлгүй болтлоо даруулж, дарлуулах систем бий гэдгийг МАН-ынхан ард иргэдэд тодорхой жишээгээр харуулж, зарим намд үлгэрлэж буй. Гэхдээ энэ систем өнөөгийн удирдлагуудад өөрсдөд нь хэрэгжихгүй гэх баталгаа байхгүй. М.Энхболдыг татан унагах, улс төрөөс зайлуулах зохион байгуулалттай ажлын түүчээнд нь давхисан Ерөнхий сайд У.Хүрэлсүх, Засгийн газрын хэрэг эрхлэх газрын дарга Л.Оюун-Эрдэнэ тэргүүтэй нэр бүхий улстөрчид өглөө бүр М.Энхболдыг хэрхэн зайлуулснаа санах хэрэгтэй. Үүнийг бүр ойр ойрхон санах цаг улам бүр дөхсөөр байгаа гэхэд хилсдэхгүй биз ээ.

Учир нь, тэд одоогийн албан тушаалаа түүнийг явуулсныхаа шанд авсан гэх яриа олны дунд өнөөг хүртэл байсаар ирсэн билээ. Гол нь тэд улс төрийн ийм хууль бус томилгоо, завхрал, ах дүү, танил талаа төрийн албанд хууль бусаар томилдог байдлыг халах гэж, нийгэмд шударга ёс тогтооно хэмээн тухайн үед УИХ-ын даргаа татан унагаж, огцруулж байсан билээ. Гэвч тэд чадсангүй. Харин ч бүр хоёрхон жилийн хугацаанд төрийн зангараг, ёс зүйг МАНАН-гийн сүлжээндээ сүлжиж орхиод, төрийн албыг төрлийн, намын шахаатайгаа хутган үймүүлж, бүх шатны чадварлаг, мэргэшсэн боловсон хүчнүүдийг салбараа, ажлаа мэддэггүй, наад захын мэдлэг, боловсролгүй цүнх баригч, “шахаа”-ны хүмүүсээрээ солиод байна.

Үүний үргэлжлэл маргааш эхлэх Орон нутгийн сонгуулиар буухиалж, үр дүнд нь Лоббины Засгийн газар орон даяар бүрэн утгаараа бүрдэх бололтой. Гэхдээ МАН-ын томчууд нийслэлийн МАН-ын удирдлага, гишүүдтэйгээ түнжин тун муу байгааг онцлох хэрэгтэй. Энэ тохиолдолд өдгөө хорих ангид ялаа эдэлж буй МАН-ын бурхинууд, тэдний “хөл, гар”-ууд нийслэлийг толгойлж буй МАН-ынхантай хүчээ нэгтгэх нь дамжиггүй. “Тос дотроосоо өтдөг”-ийн үлгэр эндээс үргэлжилж ч мэдэхээр байгааг мөн тодотгоё.