Ерөнхий сайд асан П.Жасрайн зээ охин Хөдөлмөр, нийгмийн хамгааллын сайд А.Ариунзаяа танил талынхаа хүмүүст төрийн тамгатай төрсөн өдрийн мэндчилгээ илгээж, сайдын эрх мэдлээрээ сюрприз барьжээ. Төр нийгмийн нэрт зүтгэлтний зээ, чухал салбарын сайд байлаа гээд түүнд төрийн тамгаар тоглох эрх баймааргүй юм. Гэтэл тэр Д.Эрдэнэбат, Г.Наранбаяр нарын хүмүүст “ Мэдлэг боловсрол, ур чадвар, бүтээлч сэтгэлгээгээр Хөдөлмөр, нийгмийн хамгааллын салбарт хувь нэмрээ оруулж байгаа Танд төрсөн өдрийн мэнд хүргэе!” Хөдөлмөр, нийгмийн хамгааллын сайд А.Ариунзаяа гэсэн гарын үсэгтэй, сайдын тамгатай мэндчилгээ илгээжээ.

Төрийн тамга төрсөн өдрийн мэндчилгээнд ашиглагдах хүртлээ үнэгүйдсэн гэж  үү, Ямар үнэтэй төрсөн өдрийн өдрийн мэндчилгээ вэ, Эгэл жирийн иргэн, аж ахуйн нэгжид бол төрийн тамга асар үнэтэй. Тэр тамгыг албан бичигтээ даруулахын тулд тэд хэдэн сар жилээр хүлээдэг, үүдийг нь сахидаг, эцэстээ хээл хахууль санал болгох нь ч бий. Гэтэл албан бичигт дарагдах ёстой тамгыг А.Ариунзаяа сайд танил талдаа төрсөн өдрийн мэнд хүргэхэд ашиглаж байгааг юу гэж ойлгох вэ?

Төрийн тамгаар танил тал, яамныхаа ажилтнуудад төрсөн өдрийн мэндчилгээ дэвшүүлсэн сайд А.Ариунзаяа өөрийн цахим хаягаараа дээрх үйлдэлдээ тайлбар хийжээ. Тэрбээр Статистикийн үндэсний хорооны дарга байхдаа ч ажилтнууддаа даргын тамгатай мэндчилгээ илгээдэг байсан тухайгаа хэлсэн байх аж. Төрд зүтгэж буйг нь урамшуулж буй хэлбэр гэжээ. Мөн хүмүүс шүүмжилж байгаа тул дахин тамга дарж мэндчилгээ илгээхгүй, тамгагүйг илгээнэ гэсэн “хүлцэлгүй” тайлбар хийсэн болоод өнгөрөх нь. Төрд зүтгэсэн, ур чадвараараа бусдыгаа манлайлсан, салбартаа хувь нэмрээ оруулсан хүмүүсийг үнэлдэг төрийн шагналууд зөндөө бий. Наандаж л баяр бүрээр “тараагддаг” салбарын сайдын “Жуух бичиг” гэх шагнал ч бий. Харин сайд А.Ариунзаяа “төрсөн өдрийн төрийн тамгатай мэндчилгээ”гэдэг шинэ шагналыг төрд оруулж ирж буйгаа зарлаж байгаа бололтой.