Ардчилсан намаас Ерөнхийлөгчийн сонгуулийн үр дүнгийн талаар мэдээлэл хийлээ. Энэ үеэр тэд Ерөнхийлөгчийн ээлжит сонгуулийн үр дүнг хүлээн зөвшөөрөхгүй байгаа гэдгээ илэрхийлэв.

 

Тус намын нарийн бичгийн дарга Ч.Өнөрбаяр "Ардчилсан сонгууль бол улс төрийн намуудын үнэт зүйл зарчимд тулгуурлан тэгш шударга зарчмаар өрнөдөг. Гэтэл ийм байхаа больжээ. Гэтэл олон зүйл төр бүтцээрээ ажилдаг болсон байна. Ер нь 2020, 2021 оны сонгуулийг харахад МАН-ын сонгуулийн үр дүнг бусад нам хууль ёсны мэт харигдуулдаг байдал бий болжээ. Тиймээс энэ удаагийн сонгуулийг бид шударга сонгууль гэж бодохгүй байна. Бидний ялагдал их хувьсгалын түүх болдог туршлага бий. Цаашид бид ардчиллын төлөөх намуудтай нэгдэх ёстой юм байна. Тэгэхгүй бол МАН ба бусад гэсэн байдал бий болжээ. Үүнтэй бид тэмцэнэ. Ардчилсан намын шинэчлэл үргэлжилнэ. Бид иргэд сонгогчийн итгэл үнэмшлийг хүлээдэг тэр байдал руугаа явах цаг болжээ" гэсэн юм.

 

Ардчилсан намын гишүүн О.Магнай "МАН-ынханд баяр хүргэх болоогүй гэж хэлмээр байна. Ардчилсан сонгууль гэдэг нь  зөвхөн санал хураах үйл явцыг хэлэхгүй. Сонгуулийн үйл явц тэр чигтэй байх ёстой. Гэтэл МАН-ын 100 жилийн ой гэсэн нэрээр мөнгө тараасан, төсвийн мөнгөөр төрийн сонгуулийг худалдаж авсан үйл явдал боллоо" гэлээ.