Монгол Улсын найм дахь Ерөнхийлөгчийн сонгуулийн санал хураалт дууслаа. Одоогийн байдлаар МАН-аас нэр дэвшигч У.Хүрэлсүх ялалт байгуулж, Ардчилсан намаас нэр дэвшигч С.Эрдэнэ хамгийн бага санал аваад байна. Тодруулбал, 22:50 цагийн байдлаар У.Хүрэлсүх 745330, Д.Энхбат 230029, С.Эрдэнэ 64570 хүний санал авчээ.

ХҮН-аас нэр дэвшигч Д.Энхбат өөрийн цахим хуудастаа тайлбар бичжээ. Тэрбээр “Сонгууль өндөрлөлөө. Манай баг, дэмжигчид маш сайн ажилласан. Бид энэ сонгуульд гэрэл гэгээ, шинэ өнгө авчирч чадсандаа баяртай байна. Сайн цаг өөрөө ирдэггүй, түүнийг авчирдаг гэдэгт итгэж бид зүтгэсэн.  Монголчууд бидний сонголт мэргэн байж улс орон минь мандан бадрах болтугай. Чин сэтгэлээсээ, хамтдаа зүтгэвэл ялалт бүрэн боломжтойг Монголын шинэ үеийнхэнд мэдрүүлсэн бол бидний зүтгэл үр дүнгээ өгсөн гэсэн үг. Хуучин нүсэр тогтолцоо, халамжийн сэтгэлгээ тийм ч хүчтэй бус, удахгүй солигдох болно. Өнөөдөр бид тэр зүгт нэг алхам хийлээ. Амжилт” хэмээн бичжээ.