Өнөөдөр 07:00 цагт эхэлсэн Ерөнхийлөгчийн сонгуулийн санал хураалтын ирц 18:00 цагийн байдлаар ердөө 39 хувьтай байгаа нь нэр дэвшигчид, намууд, СЕХ тэргүүтэй сонгууль хамтран зохион байгуулагч төрийн байгууллагууд, саналаа эрт өгсөн иргэдийн санааг зовоож эхэллээ.Их үдийн 11:00 цаг хүртэл сонгогчдын ирц сайн байсан боловч 16:00 цагаас сонгогчдын ирц зогсонги байдал руу шилжээд байна. Энэ байдлаараа 22:00 цагт санал хураалт зогсох хүртэл сонгогчдын ирц 50 хувьд хүрэхгүй бол 2017 оны Ерөнхийлөгчийн сонгуулийн түүх давтагдаж, хоёр дахь шатны санал хураалт явуулах хэрэгтэй болно. Өөрөөр бол, УИХ дахин сонгуулийн товыг хэлэлцэж зарлах, санал хураалтын бэлтгэл хангах зэргээр наадам болтол Ерөнхийлөгчийн сонгуультайгаа “зууралдах” хэрэгтэй болно гэсэн үг. 

 

Сонгуулийн ерөнхий хорооны танилцуулсан мэдээллээр 18:00 цагийн байдлаар нийслэлээс ганцхан Багахангай дүүргийн сонгогчдын ирц 50 хувь давсан байгаа бол аймгуудаас Хэнтий, Говь-Алтай аймгийн сонгогчдын ирц хамгийн өндөр буюу 42 хувьтай байна. Түүнчлэн нийслэлээс Сонгинохайрхан, Налайх дүүргийн сонгогчдын ирц хамгийн бага буюу 39 хувьтай байгаа бол аймгуудаас Сэлэнгэ аймгийн сонгогчдын ирц дөнгөж 27.6 хувьтай байна. Товчхондоо, Багахангай дүүргээс өөр ирц нь 50 хувьдаа хүрсэн аймаг, дүүрэг алга. 

 

 

        Энэ удаагийн Ерөнхийлөгчийн сонгуульд 2 041 481 иргэний нэр сонгогчийн нэрсийн жагсаалтад бүртгэгдсэн. Тэдний талаас илүү хувь нь 20-39 насны залуус. Гэтэл залуучуудын ирц хангалтгүй байгаа нь хоёр дахь шатны сонгууль явуулах нөхцлийг бий болгож болзошгүй байна. Саналаа өгч иргэний үүргээ биелүүлдэггүй, ирээдүйдээ санаа зовдоггүй хариуцлагагүй иргэдээс болж дахин санал хураалт явуулах шаардлагатай болбол төсөв хөрөнгө, төрийн албан хаагчдын цаг зав, төрийн ажлын саатал зэрэг олон талын хохиролтой. Жишээ нь, энэ удаагийн Ерөнхийлөгчийн сонгуулийн зохион байгуулалтад нийт 26,9 тэрбум төгрөг зарцуулж байгаа. Хэрвээ дахин санал хураалт явуулах шаардлагатай болбол нэмж найман тэрбум төгрөг зарцуулах тооцоог Сонгуулийн ерөнхий хорооноос танилцуулсан. Цар тахлын хямралын энэ үед найман тэрбум төгрөг хий дэмий салхинд хийсгэсэн дээр үү, эсвэл хэдхэн минут зарцуулаад саналаа өгсөн нь дээр үү гэдэг асуултыг саналаа өгөөгүй байгаа сонгогч танаас асуумаар байна. 

 

Иймд санал хураалт дуусахад ердөө хоёр цаг хагасын хугацаа үлдээд байгаа тул иргэн та яг одоо сонголтоо хийж, ирэх зургаан жилд улс орныг залах Ерөнхийлөгчөө сонгох сонгуульдаа саналаа өгөхийг уриалж байна.