Олон улсад цар тахал дэгдэж, дэлхий нийтээр хөл хорио тогтоосон энэ үед ОХУ-ын Гадаад хэргийн сайд Сергей Лавров, Монгол Улсын Гадаад харилцааны сайд Н.Энхтайван, Казахстаны Гадаад хэргийн сайд Мухтар Тилеуберди, Кыргыз Улсын Гадаад харилцааны сайд Чингиз Айдарбеков нарын урилгаар БНХАУ-ын Төрийн зөвлөлийн гишүүн, Гадаад хэргийн сайд Ван И ШХАБ-ын гишүүн орнуудын Гадаад хэргийн сайд нарын зөвлөлийн хуралд оролцохын зэрэгцээ Казахстан, Кыргызстан, Монголд айлчилж байна. 

Энэ оны есдүгээр сарын 10-нд Москва хотод болсон ШХАБ-ын гишүүн орнуудын Гадаад хэргийн сайд нарын зөвлөлийн ээлжит чуулганаар дэлхий даяар тархаж буй шинэ коронавирусийн халдварын нөхцөлд ШХАБ-ын үйл ажиллагааны цаашдын хөгжил, боломжийг хэлэлцсэн тухай ОХУ-ын Гадаад хэргийн яамны цахим хуудаст мэдээлжээ. Цар тахлаас үүссэн амаргүй нөхцөл байдал, улс төр, нийгэм, худалдаа эдийн засгийн хүндрэлийг харилцан итгэлцэл, хамтын эрх ашгийг чухалчлан даван туулж, цаашдын хөгжлийг бэхжүүлэх нь чухал гэдгийг тэд энэ уулзалтаар онцолж байна. Мөн ирэх 2021-2025 онд ШХАБ-ын Стратегийн хөгжлийн төлөвлөгөөг хэрэгжүүлэх, улс төр, эдийн засаг, аюулгүй байдал, хүмүүнлэгийн салбарын хамтын ажиллагааг өргөжүүлэх зэрэг асуудлыг мөн хөндсөн байна. 
Ван И мөн Казахстан, Кыргызстан, Монголд айлчилж буй нь эдгээр орнуудтай цаашдын хамтын ажиллагааг бэхжүүлэх чухал айлчлал болно гэж Хятадын Гадаад хэргийн яамны хэвлэлийн төлөөлөгч Жао Лижянь онцолжээ. 

Хятадын хөрш Казахстан, Кыргызстан, Монголд хийх энэхүү айлчлал нь цар тахал эхэлснээс хойших анхны айчлал агаад уламжлалт харилцаагаа бэхжүүлэх, “Ковид-19”-тэй хамтран тэмцэх, эдийн засаг бизнес болон бусад салбарт хамтын ажиллагаагаа өргөжүүлэх чухал ач холбогдолтой гэж Бээжин үзэж байна. 

Ван И есдүгээр сарын 12-нд Казахстанд айчлахдаа Ерөнхийлөгч Касым-Жомарт Токаевт бараалхаж, хоёр улс цаашид хөдөө аж ахуйн салбарт хамтран ажиллах, коронавирусийн халдвартай хамтран тэмцэх, худалдаа эдийн засгийн салбарт хамтын ажиллагаагаа бэхжүүлэх зэрэг асуудлаар хэлэлцжээ. БНХАУ-ын тэргүүн Си Жиньпиний “Казахстан Улс нь Хятадын стратегийн чухал түнш. Бүсдээ хамтын ажиллагаагаа өргөжүүлэх, хоёр ард түмний цаашдын хөгжлийн төлөө Хятад үргэлж бэлэн” гэсэн айлтгалыг Ван И мөн уламжилжээ. 

Кыргызстан Улсад хийсэн айчлалынхаа хүрээнд Ван И тус улсын Гадаад хэргийн сайд Чингиз Айдарбековт бараалхав. Кыргыз цар тахлын халдвартай тэмцэж, нөхцөл байдлыг хяналтдаа авсаныг Ван И онцолж, цаашид цахим эдийн засаг, хөдөө аж ахуйн бүтээгдэхүүний худалдаа зэрэг салбарт амтын ажиллагаагаа идэвхжүүлэх нь чухал гэж мэдэгдлээ хэмээн гаднын хэвлэлүүдэд онцолжээ.