Сонгуулийн ерөнхий хорооноос Ерөнхийлөгчийн сонгуулийн санал хураалтын ирцийн талаар мэдээллээ. 2021 оны Монгол Улсын Ерөнхийлөгчийн сонгуульд саналын эрхтэй 2.4 сая иргэн байгаагаас 12:00 цагийн байдлаар 287 мянга 566  сонгогч саналаа өгөөд байна. Энэ удаагийн сонгуульд 2087 хэсгийн хорооноос ирэх санал хураалтын дүнг нэгтгэх юм.

Одоогийн байдлаар 1800 орчим хэсгийн хорооны саналын мэдээлэл программ хангамжид нэгтгэгдээд байгаа аж. Энэ талаар Сонгуулийн ерөнхий хорооноос “Холбоо харилцаа, сүлжээ муу газруудаас одоогоор мэдээлэл ирээгүй байна. Удахгүй программ хангамжид санал хураалтын мэдээлэл нэгтгэгдэнэ” гэлээ.

Харин зөөврийн битүүмжилсэн хайрцгаар авах саналтын хураалтын ирц 92.1 хувьтай байгаа аж. Үүнээс коронавирусийн халдвар аван эмнэлэгт хэвтэж буй болон, тусгаарлалтад байгаа 5789 сонгогч саналаа өгчээ.