Монгол Улсын 2021 оны Ерөнхийлөгчийн сонгуулийн санал хураалт өнөөдөр 07:00 цагт албан ёсоор эхэллээ. Найм дахь удаагийн энэ сонгуульд МАН-аас У.Хүрэлсүх, АН-аас С.Эрдэнэ, "Зөв хүн-Электорат" эвслээс Д.Энхбат нар нэр дэвшиж байна. Үндсэн хуулиар шинэ Ерөнхийлөгч Монгол Улсын төрийн тэргүүнээр зургаан жил ажиллана.

Энэ удаагийн Ерөнхийлөгчийн сонгуульд 29.6 тэрбум төгрөг зарцуулж байгаа бөгөөд сонгогчдын ирц хүрээгүй тохиолдолд дахин санал хураалтыг найман тэрбум төгрөгөөр зохион байгуулах талаар Сонгуулийн ерөнхий хорооноос өчигдөр мэдээлсэн билээ.

Санал хураалтын үйл ажиллагаа 22:00 цаг хүртэл үргэлжлэх бөгөөд саналын хуудсыг гараар тоолж автоматжуулсан төхөөрөмжийн дүнтэй тулгаж, олон нийтэд мэдээлэх юм.