Ерөнхийлөгчийн сонгуулийн санал хураалт маргааш буюу зургаадугаар сарын 9-нд болно. Харин өнөөдөр зөөврийн битүүмжилсэн хайрцгаар санал авах ажиллагааг орон даяар 09:00-20:00 цагийн хооронд зохион байгуулж байна.

Ерөнхийлөгчийн сонгуулийн тухай хуулиар дараах иргэд зөөврийн хайрцгаар санал өгөх эрхтэй.

• Эрүүл мэндийн байдлын улмаас санал авах байранд өөрийн биеэр очиж чадахгүй сонгогч
• Дайчилгааны тухай хуульд заасны дагуу нийтийн дайчилгаанд хамрагдан ажиллаж байгаа сонгогч
• Зөрчлийн улмаас баривчлагдсан сонгогч
• Эрүүгийн хэрэг хянан шийдвэрлэх тухай хуульд заасны дагуу баривчлагдсан, цагдан хоригдсон сонгогч зөөврийн битүүмжилсэн хайрцгаар саналаа өгнө.

Энэ талаар Сонгуулийн ерөнхий хорооноос “Эрүүл мэндийн болон бусад шалтгааны улмаас санал хураах байранд ирэх боломжгүй иргэд зөөврийн битүүмжилсэн хайрцгаар санал өгөх хүсэлт гаргадаг. Хуульд заасны дагуу зөөврийн хайрцгаар саналаа өгөх 18 мянга орчим иргэн бий. Мөн тусгаарлан ажиглах байр, гэрийн тусгаарлалт болон халдвар аваад эмнэлэгт хэвтэн эмчлүүлж буй 7051 сонгогч зөөврийн хайрцгаар саналаа өгнө. Ингээд нийт 25 мянга гаруй сонгогч зөөврийн хайрцгаар энэ удаагийн сонгуульд саналаа өгөхөөр байна. Өнөөдрийн байдлаар Улаанбаатар хотод нитйт 457 хэсгийн хороо ажиллаж байна. Үүнээс 3-4 баг зөөврийн битүүмжилсэн хайрцгар санал авахаар ажиллаж байна” гэлээ.