Mөнгөний нийлүүлэлт энэ оны гуравдугаар сарын эцэст урьдчилсан гүйцэтгэлээр 25 их наяд төгрөг болжээ. Энэ нь өмнөх оны мөн үеийнхээс 4.6 их наяд төгрөгөөр нэмэгдсэн аж. Үүнд валютын хадгаламж 0.7 их наяд, төгрөгийн хадгаламж 3.4 их наяд төгрөгөөр өссөн гэдгийг Үндэсний статистикийн хороо мэдээлсэн юм. Төгрөгийн хадгаламж өнгөрсөн сарын эцэст 14.1 их наяд төгрөг болж, өмнөх сарынхаас 47.2 тэрбум, өмнөх оны мөн үеийнхээс 3.4 их наяд төгрөгөөр нэмэгджээ. Төгрөгийн хадгаламжийн 88.6 хувь нь иргэдийн, 11.4 хувь  аж ахуйн нэгж, байгууллагынх байлаа.

Хугацаа хэтэрсэн зээлийн өрийн үлдэгдэл гуравдугаар сарын эцэст 1.3 их наяд төгрөг болж, өмнөх сарынхаас 69.7 тэрбум төгрөгөөр багасаж, өмнөх оны мөн үеийнхээс 132.2 тэрбум төгрөгөөр нэмэгдсэн байна. Хугацаа хэтэрсэн зээлийн өрийн үлдэгдэл нийт зээлийн өрийн үлдэгдлийн 7.3 хувийг эзэлж, өмнөх оныхоос 0.6 пунктээр нэмэгдсэн байна.